Бүгд Найрамдах Польш Улсын Гадаад хэргийн сайдын албан айлчлалын хүрээнд, Гадаад хэргийн Сайд ноён Збигнев Рау тэргүүтэй төлөөлөгчид МУИС–д айлчлан ирж, хүндэт зочдыг МУИС-ийн захирал Б.Очирхуяг, Эрдэм шинжилгээ, хамтын ажиллагаа хариуцсан дэд захирал С.Должин болон Хамтын ажиллагааны хэлтсийн дарга Д.Бадамдаш нар хүлээн авч уулзав. Монгол Улс, Польш улсын хооронд дипломат харилцаа тогтоосноос хойш 70 гаруй жилийн хугацаанд хоёр орны ард түмнүүдийн найрамдалт харилцаа тасралтгүй хөгжсөөр ирсэн бөгөөд Польшийн монгол судлал, Монголын польш судлалын хөгжил хүрээгээ тэлсээр байгаа талаар уулзалтын талуудын ярианд онцлон дурдагдаж байлаа.
Монголын ард түмэн польш хэл соёлыг хэзээнээс нааш сонирхон судалж ирсэн бөгөөд Монгол улсын их сургууль 1992 онд польш хэлний ангийг нээн элсэлт авч эхэлсэн билээ. 2016 он хүртэл польш хэлний ангийг 87 оюутан төгсөж польш хэл, орон судлаач мэргэжил эзэмшин диплом гардан авчээ. Мөн МУИС Польшийн хэд хэдэн их сургуультай хамтын ажиллагааны гэрээ байгуулж, хамтарсан хөтөлбөр, оюутан солилцоо зэрэг бодитой ажлуудыг тасралтгүй хэрэгжүүлж ирсэн.
Өнгөрсөн жил МУИС болон БНПУ-ын элчин сайдын яам хамтран Монгол улс, БНПУ-ын хооронд дипломат харилцаа тогтоосны 71 жилийн ойн хүрээнд “Монгол-Польшийн харилцаа, хамтын ажиллагаа: өнгөрсөн, одоо, ирээдүй” сэдэвт олон улсын эрдэм шинжилгээний бага хурал хоёр улсын парламентын дэд дарга нарын ивээл дор амжилттай зохион байгуулагдсан.
Тэнхимийн сургалтын материаллаг баазыг бэхжүүлэх, польш хэлний ангийг тохижуулах, ном сурах бичгээр хангахад Монгол Улсад суугаа БНПУ-ын Элчин сайдын яам, ялангуяа польшийн үе үеийн элчин сайд нар үнэтэй хувь нэмэр оруулж байгаа талаар МУИС-ийн захирал Б.Очирхуяг мөн онцлон тэмдэглэлээ.
Уулзалтын төгсгөлд Гадаад хэргийн сайд ноён Збигнев Рау Польш-Монголын харилцаа хамтын ажиллагааг улам бүр гүнзгийрүүлэн хөгжүүлэхэд МУИС-ийн хамт олон үнэтэй хувь нэмэр оруулж байгаад талархал илэрхийлээд МУИС-ийн Захирал Б.Очирхуягт “Bene Merite Хүндэт Медаль”-ыг хүндэтгэлтэйгээр гардуулав.
Ингээд МУИС-ийн хичээлийн II байрны 4 давхарт 2008 онд БНПУ-ын ерөнхийлөгч Лех Качиньски Монголд төрийн дээд айлчлал хийх үед БНПУ-ын ерөнхийлөгч Лех Качиньскид “МУИС-ийн хүндэт доктор” цол олгож байсан үйл явдлыг дурсан ноён Ерөнхийлөгч, хүндэт доктор Лех Качиньскид зориулж хүндэтгэлийн самбарыг албан ёсоор нээх үйл ажиллагаа болж өнгөрлөө.
ХАМТЫН АЖИЛЛАГААНЫ ХЭЛТЭС
