Монгол Улсын Их Сургуулийн дэргэдэх Математик Хэрэглээ Төвөөс Монголд 3 дахь удаагаа “Үйлдвэрлэлтэй хамтарсан математик судалгааны семинар”-ыг 2022 оны 6 дугаар сарын 6-10-ны өдрүүдэд зохион байгуулж байна.
Энэхүү судалгааны семинар нь математикчид болон аж үйлдвэрийн салбаруудын хооронд технологи, мэдлэг дамжуулах үндсэн зорилготой, олон улсын эрдэмтэд болон аж үйлдвэрийн салбарынхны дунд нэр хүнд бүхий үйл ажиллагаа бөгөөд Европын улсууд болон Австрали, Япон зэрэг орнуудад тогтмол зохион байгуулагдсаар байна.
Уг семинарын зорилго нь:
• Аж үйлдвэр, пүүс компаниуд болон бизнес эрхлэгчдэд тулгарч байгаа асуудлуудыг математикийн шинжлэх ухааны тусламжтайгаар судлах, шинжилгээ хийх;
• Үр дүнд гарсан боломжит шийдлүүдийг тухайн үйлдвэрлэл, бизнесийн асуудлуудад нэвтрүүлэхийг санал болгох;
• Их сургууль болон аж үйлдвэрлэлийн хооронд цаашдын урт хугацааны үр ашигтай хамтын ажиллагааг бий болгох;
• Математикийн онолын судалгааны үр дүнг практик хэрэглээнд нэвтрүүлэх;
• Оюутан суралцагчдын мэдлэгийг тэлэх, харилцан суралцах, практик үйл ажиллагаанд дадах;
• Өсөх ирээдүйтэй, математик, программчлалын суурь мэдлэг өндөртэй оюутан залууст компанийнхаа үйл ажиллагаа, бодлогоо сурталчлан таниулах.
Энэ удаагийн семинарт дараах асуудлыг дэвшүүлээд байна.
1. “Улаанбаатар Гурил” ХХК-иас дэвшүүлсэн “Улаан буудайн дүрсний өгөгдлийг ашиглан ангилах”
2. “Эрдэнэс Тавантолгой” ХХК-иас дэвшүүлсэн “Гашуун сухайт авто зам ашиглалтын өгөгдлийн бүртгэл, хяналтын загвар боловсруулах”
3. “Дижитал солюшнс” ХХК-с дэвшүүлсэн “Олон тоглогчтой клауд тоглоомын серверийн байрлалын оптимизаци”
Судалгааны семинар (Study Group) гэж юу вэ?
Судалгааны семинар нь математикчид болон аж үйлдвэрийн салбаруудын хоорондын хамтын ажиллагааны нэгэн хэлбэр бөгөөд Европын улсууд болон Австрали, Япон зэрэг орнуудын их сургуулиуд дээр тогтмол зохион байгуулагддаг үйл ажиллагаа юм.
Судалгааны групп нь өөрийн гэсэн тогтсон үйл ажиллагааны формат, дараалалтай байдаг.
Даваа (2022.VI.06) Семинарын эхний өдөр компанийн төлөөлөгчид үйлдвэрлэлийн явцад тулгарч байгаа асуудлуудыг (бодлого) оролцогчдод танилцуулах ба оролцогчид өөрсдийн сонирхсон чиглэлээр судалгааны багууд болон хуваагдана. Багууд сонгосон сэдвийнхээ дагуу асуудал дэвшүүлсэн үйлдвэр, компаниудын төлөөлөгчидтэй уулзаж бодлоготойгоо дэлгэрэнгүй танилцан, ажлын төлөвлөгөө гаргана.
Мягмар (2022.VI.07), Лхагва (2022.VI.08), Пүрэв (2022.VI.09) Судалгааны үндсэн хугацаанд дэвшүүлсэн асуудлын математик загварыг томъёолох, анализ хийх, хэлэлцүүлэг хийх зэргээр шийдвэрлэх боломжит арга замуудыг багаараа судална.
Баасан (2022.VI.10) Семинарын сүүлийн өдөр гарсан үр дүн, боломжит шийдэл, шинэлэг санаа, арга замыг бодлого дэвшүүлэгч талд танилцуулна.
Оролцогчид: Математик, хэрэглээний математик, хэрэглээний статистик мэргэжлийн бүх түвшний оюутнууд, багш нар
Тус семинар нь 2018 болон 2019 онуудад зохион байгуулагдаж байсан бөгөөд хурлын талаарх мэдээллийг дараах холбооснуудаас үзэх боломжтой.
- https://news.num.edu.mn/?p=50851
- https://news.num.edu.mn/?p=50975
- https://news.mn/r/780627/
- https://news.num.edu.mn/?p=66577
МУИС-ХШУИС Хэрэглээний математикийн тэнхим
Математик Хэрэглээ төв
