2022-2023 оны хичээлийн жилийн намрын улиралд Оюутан, төгсөгчийн хэлтэс гадаад оюутныг чиглүүлэх, зөвлөгөө туслалцаа үзүүлэх “Чиглүүлэгч оюутан” /Mentor student program/ хөтөлбөр хэрэгжүүлж эхэллээ.
Чиглүүлэгч оюутан гэж хэнийг хэлэх вэ?
Чиглүүлэгч оюутан нь МУИС-д суралцаж буй гадаад оюутнуудад зөвлөгөө тусламж өгч, хичээлийн болон сургуулийн орчинд чиглүүлэг өгөх үүрэгтэй 1-4-р түвшний оюутан байна. Тухайн чиглүүлэгч оюутан нь гадаад оюутныг Монгол Улсад ирсэн өдрөөс хойш туслан, хичээл, сургуулийн орчин болон бусад асуудлуудад зөвлөгөө өгнө. Чиглүүлэгч оюутан хөтөлбөрт хамрагдсанаар оюутан нь гадаад хэлний мэдлэгээ сайжруулан, бусад орны соёл заншилтай танилцаж, гадаад оюутнуудад тулгардаг асуудлын талаар мэдээлэлтэй болон цаашид гадаадад сурах тохиолдолд эргээд туршлага хуримтлуулах юм.
Чиглүүлэгч оюутанд тавигдах шаардлага
- МУИС-д идэвхтэй сурч байгаа 1-4 түвшний оюутан байх;
- Англи/хятад/солонгос/орос/франц/япон хэлний мэдлэг дунд ба дундаас дээш байх;
- Хариуцлагатай, харилцааны соёлтой байх;
- Шаардлагатай үед хичээлийн жил эхлэхээс өмнө Улаанбаатар хотод байх.
Чиглүүлэгч оюутны үүрэг
- Гадаад оюутанд хичээл, хичээлийн хөтөлбөр, шалгалт, хичээлийн хуваарийн талаар мэдээлэл өгч чиглүүлэх;
- Гадаад оюутанд SiSi системийн талаар мэдээлэл зөвлөгөө өгөх;
- Гадаад оюутанд сургуулийн орчин, дотуур байр, номын сангийн талаар зөвлөгөө чиглүүлэг өгөх;
- Гадаад оюутанд утас, банк, автобусны карт, эмнэлэг, үзвэр үйлчилгээний газруудын талаар мэдээлэл өгч чиглүүлэх.
Ямар улсын хэдэн оюутанд туслах вэ?
Оюутан, төгсөгчийн хэлтсийн гадаад оюутан хариуцсан мэргэжилтэнтэй зөвлөлдөж ямар улсын, хэдэн оюутанд туслах вэ гэдгийг тохирно.
Чиглүүлэгч оюутан хөтөлбөрийн үргэлжлэх хугацаа:
Чиглүүлэх оюутан нь гадаад оюутан Монгол Улсад ирсэн цагаас буюу:
- Намрын улиралд 9 сараас 11 сар хүртэл
- Хаврын улиралд 2 сараас 4 сар хүртэл чиглүүлэг зөвлөгөө өгнө.
Энэхүү хөтөлбөрт тогтсон цагийн хуваарь байхгүй учир чиглүүлэгч оюутан нь хариуцсан гадаад оюутантай харилцаж шаардлагатай үед тусална.
Хэрхэн чиглүүлэгч оюутан хөтөлбөрт бүртгүүлэх вэ?
Хөтөлбөрт хамрагдах сонирхолтой оюутнууд өөрийн биеэр Оюутан, төгсөгчийн хэлтэст ирж гадаад оюутан хариуцсан мэргэжилтэнтэй холбогдон бүртгүүлнэ.
Бүртгэлийн хугацаа: Хүсэлт хүлээн авах эцсийн хугацаа 2022 оны 9 дүгээр сарын 5 хүртэл.
Холбоо барих: Гадаад оюутан хариуцсан мэргэжилтэн Т.Mичидмаа
МУИС-ийн хичээлийн 2-р байр 109 тоот
Даваа-Баасан 8:30-17:00
Утас: 77307730-1516
Email: studentaffairs@num.edu.mn
ОЮУТАН, ТӨГСӨГЧИЙН ХЭЛТЭС
