МУИС-ийн стратегийн төлөвлөгөөнд туссан “дэлхийн шилдэг их, дээд сургуулиудтай хамтран ажиллах” зорилтын хүрээнд БНСУ-ын тэргүүлэх их сургуулиудын нэг болох Бусаны үндэсний их сургуультай хамтран ажиллах санамж бичиг шинээр байгууллаа.
МУИС-ийн Азийн тэргүүлэх их, дээд сургуулиудтай идэвхтэй хамтран ажиллах бодлогын хүрээнд 2022 оны 4 дүгээр сарын 25-нд тус сургуулийн Гадаад харилцааны газрын дарга Бон Ку Жон болон гадаад харилцааны менежер Гаён Ким нар МУИС-д урилгаар зочилж, эрдэм шинжилгээ, хамтын ажиллагаа хариуцсан дэд захирал С.Должинтой уулзаж, хамтын ажиллагааг шинээр хөгжүүлэх, оюутан солилцоо хэрэгжүүлэхээр тохиролцсон. Үүний дагуу тус сургуулийн Гадаад харилцаа хариуцсан захирал Монсүк-И, Гадаад харилцааны газрын дарга Бон Ку Жон болон гадаад харилцааны менежер Кан Юнжү нар 2022 оны 6 дугаар сарын 15-нд МУИС-д айлчилж, хамтран ажиллах санамж бичгийг шинээр байгууллаа.
Шинээр байгуулсан санамж бичгийн хүрээнд багш, оюутан, ажилтан солилцох, хамтарсан судалгаа хэрэгжүүлэх, хамтарсан сургалт, семинар зохион байгуулах, их сургуулийн үйл ажиллагаа, менежментийн туршлага солилцохоор тохиролцов.
Тус сургууль нь БНСУ-ын өмнөд хэсэг дэх Бусан хотод байрладаг, 1946 онд байгуулагдсан, төрийн өмчит сургууль бөгөөд Солонгосын үндэсний тэргүүлэх 10 их сургуулийн нэг юм. Мөн тус сургууль нь QS 2021 оны дэлхийн их сургуулиудын эрэмбээр 584-т, Азийн их сургуулиудын эрэмбээр 97-д жагссан байна.
Бусаны үндэсний их сургууль нь 12 коллеж, 6 ахисан түвшний сургуультай бөгөөд тэдгээрт нийт бакалаврын 17,400 оюутан, ахисан түвшний 9140 оюутан суралцдаг. Тус сургууль нь байгаль, нийгэм, хүмүүнлэгийн ухаан, анагаах ухаан, инженерчлэл зэрэг өргөн салбарын хүрээнд сургалт, судалгаа эрхэлдэг бөгөөд инженерчлэлийн салбарт улсдаа тэргүүлэх хөтөлбөрүүдтэй юм.
Тус сургуулийн дэлгэрэнгүй мэдээллийг https://www.pusan.ac.kr/kor/Main.do цахим хуудаснаас үзнэ үү.
ХАМТЫН АЖИЛЛАГААНЫ ХЭЛТЭС
