Монгол Улсын Их Сургуулийн стратегийн төлөвлөгөөнд туссан “дэлхийн шилдэг их, дээд сургуулиудтай хамтран ажиллах” зорилтын хүрээнд БНХАУ-ын тэргүүлэх их сургууль- Цинхуа их сургуультай хамтран ажиллах санамж бичиг байгууллаа.
Цинхуа их сургууль нь 1911 онд байгуулагдсан, БНХАУ-ын нийслэл Бээжин хотод байрладаг. Тус их сургууль нь харьяа 20 бүрэлдэхүүн сургууль, 57 тэнхимдээ байгаль, нийгэм, хүмүүнлэгийн ухаан, инженерчлэл, бизнес, анагаах ухаан зэрэг өргөн салбарын хүрээнд бакалаврын 51, магистрын 139, докторын 107 хөтөлбөр хэрэгжүүлдэг байна. Тус их сургууль нь 6000 гаруй багш, ажилтантай, 37000 орчим оюутантай бөгөөд үүний 46 хувь нь бакалаврын, 54 хувь нь ахисан түвшний оюутан юм. Цинхуа их сургууль нь QS Дэлхийн их сургуулиудын 2023 оны эрэмбээр 14-т жагссан бөгөөд Азийн их сургуулиудын эрэмбэд 5-д жагссан, дэлхийн түвшний тэргүүлэх их сургууль юм.
Шинэчлэн байгуулж буй хамтын ажиллагааны санамж бичгийн хүрээнд тус сургуультай эрдэм шинжилгээний хамтын ажиллагаа, солилцоо, хамтарсан судалгааг дэмжих, багш, судлаач, оюутан солилцооны хөтөлбөр хэрэгжүүлэхээр тохиролцов. Тиймээс багш, судлаачид та бүхний тус сургуультай хамтран ажиллах, салбар хоорондын хамтын ажиллагааг хөгжүүлэх аливаа санал, санаачилгыг Хамтын ажиллагааны хэлтэс нээлттэй хүлээн авж ажиллах болно.
Цинхуа их сургуулийн талаарх дэлгэрэнгүй мэдээллийг тус сургуулийн цахим хуудаснаас https://www.tsinghua.edu.cn/en/index.htm үзнэ үү.
ХАМТЫН АЖИЛЛАГААНЫ ХЭЛТЭС
