АНУ-ын Вебстер их сургуулийн төлөөлөгчид 2022 оны 9 дүгээр сарын 1-ний өдөр МУИС-д зочиллоо. Вебстер их сургуулийн Олон улсын кампус хариуцсан захирал Риан (Dr. Ryan V. Guffey), Нидерланд дахь кампусын захирал Жан Пол (Dr. Jean Paul Van Marissing), зөвлөх Изат Арипов, Ц.Шижир нарыг МУИС-ийн захирлын албан үүргийг түр орлон гүйцэтгэгч Б.Очирхуяг, профессор Д.Бадмаанямбуу, Хамтын ажиллагааны хэлтсийн дарга Д.Бадамдаш нар хүлээн авч уулзлаа. Уулзалтаар тус сургуультай хамтарсан сургалт эрхлэх, хамтарсан хөтөлбөр хэрэгжүүлэх, багш, оюутан солилцооны хөтөлбөр хэрэгжүүлэх боломжуудын талаар санал солилцов.
Вебстер их сургууль нь АНУ-ын Сейнт Луйс хотод 1915 онд байгуулагдсан, хувийн хэвшлийн, ашгийн төлөө бус их сургууль юм. Тус сургууль нь бакалаврын 100, ахисан түвшний 50 гаруй хөтөлбөр хэрэгжүүлдэг, Грек, БНХАУ, Швейцар, Гүрж, Узбекстан, Австри, Нидерланд зэрэг 10 улсад 14 кампустай олон улсын их сургууль. Нийт 11000 гаруй оюутантайгаас 7000 гаруй нь АНУ-аас бусад улс дахь кампусуудад суралцдаг байна.
ХАМТЫН АЖИЛЛАГААНЫ ХЭЛТЭС
