МУИС-ийн дэлхийн шилдэг их, дээд сургуулиудтай хамтран ажиллах, уламжлалт хамтын ажиллагааг бэхжүүлэх, Ахисан түвшний сургуулийн гадаад хамтын ажиллагааг хөгжүүлэх зорилтын хүрээнд Австралийн тэргүүлэх их сургуулиудын нэг болох Баруун Сиднейн их сургуультай хамтран ажиллах санамж бичиг шинэчлэн байгууллаа.
Тус сургуулийн захирал профессор Б.Гловер (Barney Glover), Гадаад харилцааны газрын дарга И-чен Лан (Yi-Chen Lan) болон Азийн асуудал эрхэлсэн мэргэжилтэн Кевин Хо (Kevin Ho) нар 2014 оны 9 дүгээр сарын 19-ний өдөр МУИС-д анх айлчилж, хамтын ажиллагаа хөгжүүлэх боломжуудыг хэлэлцэн хамтын ажиллагаа тогтоож байсан. Үүний хүрээнд хоёр их сургууль мэдээллийн технологи, инженерчлэл, хүрээлэн буй орчин, бизнесийн чиглэлд хамтарч ажиллахаас гадна МУИС-ийн зуны сургуульд тус сургуулийн оюутнууд хамрагдаж ирсэн.
Энэ удаа хамтын ажиллагааг илүү гүнзгийрүүлж, ахисан түвшний сургалт, судалгааг дэмжихээр АТС-ийн захирал Н.Баатарбилэг, тус сургуулийн Олон улсын хөгжил хариуцсан захирал И-чен Лан, Ахисан түвшний судалгааны сургуулийн захирал Г.Балдок нар 2022 оны 3 дугаар сарын 23-ны өдөр цахимаар уулзаж, хамтын ажиллагааг эрчимжүүлэхээр тохиролцсон. Үүний хүрээнд тус сургуультай эрдэм шинжилгээ, судалгааны хамтын ажиллагааг хөгжүүлэх, ахисан түвшний оюутан солилцох, байгалийн ухаан, инженерчлэлийн чиглэлд хамтарсан хөтөлбөр, сургалт зохион байгуулах, докторын оюутны эрдэм шинжилгээний ажлыг хамтран удирдах зэргээр хамтран ажиллах санамж бичиг байгууллаа.
Баруун Сидней их сургууль нь 1989 онд байгуулагдсан, төрийн өмчит, 60000 гаруй оюутан суралцагчтай томоохон их сургууль юм. Тус сургууль нь THE дэлхийн их сургуулиудын эрэмбээр 2022 онд 235-д, THE дэлхийн их сургуулиудын тогтвортой хөгжлийн нөлөөллийн эрэмбээр 1-рт жагссан байна.
Тус сургуулийн дэлгэрэнгүй мэдээллийг https://www.westernsydney.edu.au/ цахим хуудаснаас үзнэ үү.
ХАМТЫН АЖИЛЛАГААНЫ ХЭЛТЭС
