Төрийн тахилгат Суварга хайрхан ууланд холбогдох түүх, шашин, соёлын судалгаа сэдэвт эрдэм шинжилгээний хурлыг Монгол Улсын Их сургуулийн Философи, шашин судлалын тэнхим, Монгол улсын Ерөнхийлөгчийн тамгын газар, Архангай аймгийн ЗДТГ, Архангай аймгийн Цэнхэр сумын ЗДТГ, Архангай аймгийн музей хамтран 2022 оны 09 сарын 23-ны өдөр Архангай аймгийн Цэцэрлэг хотод зохион байгууллаа.
Тус хурал нь Суварга хайрхан уулын тахилга тайлгын зан үйл, уламжлал, байгаль газар зүйн онцлог, нутгийн ардын түүх, соёлын судалгааг гүнзгийрүүлэх, уул ус, газар нутгаа үе дамжин шүтэж, хайрлан хамгаалж ирсэн төрт ёс, уламжлалыг сэргээн баяжуулах, уул овооны тэнгэрийг тайх төрийн тахилгын ёслолын талаар эрдэмтэн судлаач, ард иргэд, олон нийт, төрийн байгууллагын санал дүгнэлтийг нэгтгэх зорилгоор зохион байгуулагдав.
Суварга хайрхан ууланд холбогдох түүх, шашин, соёлын судалгаа эрдэм шинжилгээний хуралд МУИС-ийн Философи, шашин судлалын тэнхимийн Проф.С.Янжинсүрэн, Доктор.О.Бумдарь, С.Дэмбэрэл, Д.Юмчинхорлоо, Д.Ринчендорж нар оролцож, тус хайрханы тухай домог, ардын аман зохиол, түүх, шашин, соёл, зан үйл, байгаль экологийн асуудлыг хөндсөн илтгэлүүдийг хэлэлцүүллээ. Хуралд нутгийн иргэд, малчид, төр захиргааны албан хаагчид, олон нийт идэвхтэй оролцож төрийн тахилгын ёслолын дэг, ёслол үйлдэх хуваарийг боловсронгуй болгох талаар өөрсдийн үзэл бодлоо илэрхийлж, саналаа хуваалцав.
