Монгол Улсын дээд боловсролын ууган байгууллага Монгол Улсын Их Сургууль үүсгэн байгуулагдаж, үндэсний дээд боловсролтой мэргэжилтэн бэлтгэж эхэлсний 80 жилийн ойн үйл ажиллагаанд оролцохоор хамтын ажиллагаа бүхий гадаадын боловсрол, эрдэм шинжилгээний байгууллагуудын удирдлага, төлөөллүүд 2022 оны 10 дугаар сарын 4-7-ны өдрүүдэд Улаанбаатар хотноо хүрэлцэн ирж, ойн хөтөлбөрт оролцлоо.
МУИС нь дэлхийн 44 орны 460 гаруй боловсрол, эрдэм шинжилгээ, аж үйлдвэрийн байгууллагуудтай хамтын ажиллагаатай бөгөөд үүнээс 23 их, дээд сургууль, шинжлэх ухааны академиудын удирдлага болон төлөөлөл нийт 60 гаруй хүндэт зочид Монгол Улсын Их Сургуулийн 80 жилийн ойд хүрэлцэн ирж хүндэтгэл үзүүлсэн юм.
Монгол Улсын Их Сургууль үүсэн байгуулагдсаны 80 жилийн ойн хуралд гадаад хамтын ажиллагаатай байгууллыг төлөөлөн МУИС-ийн анхны гадаад түнш их сургууль, Москвагийн их сургуулийн захирал, МУИС-ийн Хүндэт доктор, академич Виктор Антонович Садовничий видео мэндчилгээ илгээж, мөн БНСУ-ын Сөүл Үндэсний Их Сургуулийн захирал ноён У Сэ Жон мэндчилгээ дэвшүүлж МУИС-ийн нийт эрдмийн хамт олонд ойн баяр хүргэж, ажлын амжилт хүслээ.
Ойн хурлын үеэр МУИС-ийн Захирлын албан үүргийг түр орлон гүйцэтгэгч Б.Очирхуяг хэлсэн үгэндээ МУИС-ийн сургалт, судалгааны хөгжлийн 80 жилийн түүхэнд гадаад хамтын ажиллагаа чухал ач холбогдолтой байсныг онцлоод баярын хуралд хүрэлцэн ирсэн болон нийт гадаад хамтын ажиллагаатай байгууллагуудад гүн талархал илэрхийлэв.
Энэ үеэр гадаад хамтын ажиллагаатай байгууллагуудын төлөөллүүд МУИС-ийн Захирлын албан үүргийг түр орлон гүйцэтгэгч Б.Очирхуяг болон холбогдох мэргэжлийн тэнхим, нэгжүүдтэй хамтын ажиллагааны уулзалт хийж, хамтран ажиллах санамж бичиг, оюутан солилцооны гэрээ байгууллаа. Мөн нийт гадаад зочид МУИС-ийн ойн хурал, хүндэтгэлийн үйл ажиллагаануудад оролцож, Монголын түүх, уламжлал, соёлын өвтэй танилцах өргөн, дэлгэр хөтөлбөрт хамрагдан, хамтын ажиллагаа цаашид хөгжүүлэх санал санаачилгуудыг өрнүүлсэн олон уулзалт, ярилцлага, өдөрлөг боллоо.
МУИС-ийн 80 жилийн ойд хүндэтгэл үзүүлэхээр хүрэлцэн ирж, хамтын ажиллагаагаа бэхжүүлсэн түнш байгууллага, байгууллагын төлөөллүүдэд талархал илэрхийлье.
- Австрийн шинжлэх ухааны академи
- Алс Дорнодын Холбооны их сургууль
- Аляскийн Анкорижийн их сургууль
- Байгалийн улсын их сургууль
- Буриадын улсын их сургууль
- Венецийн Ка Фоскари их сургууль
- Гванжугийн шинжлэх ухаан, технологийн институт
- Германы Шпайрын Төрийн удирдлагын их сургууль
- Иватэ их сургууль
- Инха их сургууль
- Күүкмин их сургууль
- Мияазаки их сургууль
- Нагоя их сургууль
- Оосака их сургууль
- Оросын ШУА-ийн Сибирийн салбарын Матросовын нэрэмжит системийн динамик ба хяналтын онолын хүрээлэн
- Оросын ШУА-ийн Сибирийн салбарын Монгол, Буддын шашин, Төвд судлалын хүрээлэн
- Поханы шинжлэх ухаан, технологийн их сургууль
- Сөүлийн үндэсний их сургууль
- Тайваний үндэсний их сургууль
- Уралын Холбооны их сургууль
- Чанвоны үндэсний их сургууль
- Эрхүүгийн улсын их сургууль
- Японы нээлттэй их сургууль
ХАМТЫН АЖИЛЛАГААНЫ ХЭЛТЭС
