ОХУ-ын Владивосток хотод байрладаг Алс Дорнодын Холбооны их сургуулийн Гадаад харилцаа хариуцсан орлогч дэд захирал Никита Смирнов тэргүүтэй төлөөлөгчид Монгол Улсын Их Сургуулийн 80 жилийн ойн баярт уригдан ирж оролцлоо.
Алс Дорнодын Холбооны их сургуулийн Гадаад харилцаа хариуцсан орлогч дэд захирал Никита Смирнов 2022 оны 10 дугаар сарын 4-ний өдөр МУИС-ийн захирлын албан үүргийг түр орлон гүйцэтгэгч Б.Очирхуяг, ОУХНУС-ийн захирал Ж.Баттогтох, Улаанбаатар сургуулийн захирал О.Мөнхбат, Хамтын ажиллагааны хэлтсийн дарга Д.Бадамдаш нартай уулзаж, хамтын ажиллагааны талаар санал солилцов.
Тус сургууль нь QS 2023 дэлхийн их сургуулиудын эрэмбээр 493-д, ОХУ-д 17-д жагсдаг, Орос, Англи хэл дээр сургалт явуулдаг. Хятад, Вьетнам, Япон, Энэтхэгт олон улсын салбар нэгжтэй. Байгаль, нийгэм, хүмүүнлэгийн ухаан, инженерчлэл, анагаах ухаан зэрэг бүх салбарт сургалт, судалгаа эрхэлдэг ОХУ-ын шилдэг их сургуулиудын нэг юм. 2019 онд МУИС, АНУ-ын Ютагийн их сургуультай хамтран зохион байгуулсан “Нийгмийн ажил-нийгэм, соёлын олон талт хүчин зүйлсийн уялдаа холбоо” сэдэвт олон улсын эрдэм шинжилгээний хуралд тус сургуулийн эрдэмтэн, судлаачид оролцсон. Зүүн Хойд Азийн 5 орны их сургуулиудад үйл ажиллагаа явуулдаг “Оюутны Дугуй Ширээний Уулзалт” клуб нь ОУХНУС-ийн дэргэд 2011 онд байгуулагдсан. Энэхүү клубийн жил тутмын уулзалт, бусад үйл ажиллагаагаар хоёр сургуулийн төдийгүй бусад 3 сургуулийн оюутнууд бүс нутгийн байгаль, нийгэм, эдийн засгийн асуудлаар хамтарч ажилладаг.
Энэ удаагийн уулзалтаар талууд их сургууль хоорондын албан ёсны хамтын ажиллагааны санамж бичиг байгуулахаар тохиролцож, хоёр сургуулийн багш, судлаачид хооронд сургалт, судалгааны хамтын ажиллагааг бэхжүүлэхээр болов.
ХАМТЫН АЖИЛЛАГААНЫ ХЭЛТЭС
