Гадаад хамтын ажиллагаатай БНСУ-ын Күүкмин их сургуулийн захирал Им Хон Жэ, Хуулийн сургуулийн захирал Ли Донг Ки, Солонгосын эрх зүйн боловсролын төвийн дарга Пак Жэон Вон, профессор Ким Дунхун нарын төлөөлөгчид Монгол Улсын Их Сургуулийн 80 жилийн ойн баярт уригдан ирж оролцов.
Күүкмин их сургуулийн төлөөлөгчид 2022 оны 10 дугаар сарын 6-ны өдөр МУИС-ийн захирлын албан үүргийг түр орлон гүйцэтгэгч Б.Очирхуяг, Хууль зүйн сургуулийн захирал Б.Амарсанаа, Монгол Улсын Ерөнхийлөгчийн хууль зүйн бодлогын зөвлөх, ХЗС-ийн гэрээт дэд профессор А.Бямбажаргал, Хамтын ажиллагааны хэлтсийн дарга Д.Бадамдаш нартай уулзаж, хамтын ажиллагааны талаар санал солилцлоо.
Уулзалтын үеэр талууд хууль зүйн салбарт урт хугацаанд, тогтвортой үр ашигтай хамтран ажиллаж ирсэнд сэтгэл хангалуун буйгаа илэрхийлээд, үүнийг уламжлан хадгалахын зэрэгцээ хамтын ажиллагаагаа шинэ салбарт өргөжүүлэх сонирхлоо илэрхийлэв. Күүкминий талаас мэдээллийн технологи, дизайн, автоматжуулалтын чиглэлд хамтран ажиллах бүрэн боломжтойгоо илэрхийлж, энэ чиглэлд хамтарсан төсөл, хөтөлбөр хэрэгжүүлэх боломжийг эрэлхийлэн ажиллахаар тохиролцов. Мөн үүнээс гадна хоёр орны шинжлэх ухаан, соёлын солилцоог их сургуулиудаар дамжуулан өрнүүлэхэд анхааран ажиллахаар тохиролцов.
Мөн Күүкмин их сургуулийн захирал Им Хон Жэ 2022 оны 10 дугаар сарын 6-ны өдөр МУИС-ийн ХЗС-ийн Солонгосын эрх зүйн боловсрол төвийн оюутнууд болон магистр, докторын оюутнуудад машин автоматжуулалтын тухай болон энэ чиглэлээр АНУ-тай хамтран хэрэгжүүлж буй төслийн тухай илтгэл хэлэлцүүлсэн.
Тус сургуулийн Хуулийн сургуультай анх 2007 онд МУИС-ийн ХЗС хамтын ажиллагааны гэрээ байгуулсан. Үүний дараа 2011 онд БНСУ-ын Күүкмин их сургуулийн Хууль зүйн сургууль болон МУИС-ийн ХЗС хооронд хамтын ажиллагааны гэрээ байгуулж, 2011 оны 10 дугаар сард “Солонгосын эрх зүйн боловсролын төв”-ийг МУИС-ийн ХЗС дээр байгуулсан. МУИС ХЗС–ийн сургалтын хөтөлбөртэй зэрэгцэн солонгосын эрх зүй болон солонгос хэлний сургалт явуулж байна. Хууль зүйн үндэсний хүрээлэнтэй хамтарч монголын хуульчдад солонгосын эрх зүйн мэргэжлийн сургалт явуулж, Монгол Солонгосын хууль зүйн мэргэжилтний форумыг үүсгэн байгуулсан. Мөн тус сургуультай хамтран оюутан сурагчдын “Монгол/Солонгосын эрх зүйн соёлтой танилцах” өвөл, зуны сургалт зохион байгуулдаг, “АПРУ ЭФ ЖЭЙ” тэтгэлгийн сангаас жил бүр 10 оюутанд тэтгэлэг олгож ирсэн. 2014 онд Күүкмин их сургуулийн гүйцэтгэх захирал Проф. Др. Хон Жан Им тэргүүтэй төлөөлөгчид МУИС-д айлчилж хамтын ажиллагааны гэрээ байгуулсан. Үүний хүрээнд жилд 8 хүртэлх оюутан солилцох боломжтой болжээ.
ХАМТЫН АЖИЛЛАГААНЫ ХЭЛТЭС
