Тайваний үндэсний их сургуулийн захирал Чун-мин Куан, Олон улсын асуудал хариуцсан дэд захирал Сияо-вей Юан нар Монгол Улсын Их Сургуулийн 80 жилийн ойн баярт уригдан ирж оролцлоо.
Тайваний үндэсний их сургуулийн төлөөлөгчид 2022 оны 10 дугаар сарын 6-ны өдөр МУИС-ийн захирлын албан үүргийг түр орлон гүйцэтгэгч Б.Очирхуяг, Ахисан түвшний сургуулийн захирал Н.Баатарбилэг, Хэрэглээний шинжлэх ухаан, инженерчлэлийн сургуулийн захирал Д.Бямбажав, Хамтын ажиллагааны хэлтсийн дарга Д.Бадамдаш нартай уулзаж, хамтын ажиллагааны талаар санал солилцов.
Уулзалтын үеэр талууд ирэх хичээлийн жилд хоёр сургууль хооронд албан ёсны хамтын ажиллагаа тогтоосны 20 жилийн ой тохиож буйг онцлоод, үүний хүрээнд хамтын ажиллагааг эрчимжүүлэх хэд хэдэн саналуудыг хэлэлцэв. Үүнд:
- Ой, хүрээлэн буй орчин, хөдөө аж ахуйн чиглэлд хамтарсан судалгаа хийх, ахисан түвшний оюутан, судлаач солилцох, харилцан суралцуулах боломжийг нэмэгдүүлэх
- Мэдээллийн технологи, хиймэл оюун ухаан, инженерчлэлийн чиглэлд хамтын ажиллагааг бэхжүүлэх, оюутан солилцох
- Байгууллагын соёл, менежментийн туршлага солилцох, ажилтан солилцох зэрэг саналуудыг хэлэлцэв.
ХАМТЫН АЖИЛЛАГААНЫ ХЭЛТЭС
