МУИС-ийн Шинжлэх ухааны сургууль нь БНЭУ-ын Соёлын яамны харъяа Индира Гандийн Урлагийн Үндэсний Төвтэй (ИГУҮТ) Энэтхэгийн соёл, урлаг, буддын судлал, санскрит хэл, судар бичгийг хадгалж хамгаалах, сургалт, судалгааны чиглэлээр хамтран ажиллахаар ШУС-ийг төлөөлж Хүмүүнлэгийн салбар хариуцсан дэд захирал Др.Н.Алтантөгс, ИГУҮТ-ийн Гүйцэтгэх хорооны нарийн бичгийн дарга Др. Саччидананд Жоши нар 2022 оны 10 дугаар сарын 07-ны өдөр Харилцан ойлголцлын санамж бичигт гарын үсэг зурлаа.
Харилцан ойлголцлын санамж бичиг зурах ёслолд ШУС-ийн Философи, шашин судлалын тэнхимийн эрхлэгч Проф.М.Отгонбаяр, Др.С.Янжинсүрэн, Др.Г.Эрдэнэбаяр, Др.Д.Оюунгэрэл, Др.Ц.Нямсүрэн, Др.О.Бумдарь болон тэнхимийн бусад багш нар, МУИС-ийн Хамтын ажиллагааны хэлтсийн мэргэжилтэн Д.Мөнхтамир, Энэтхэгийн талаас БНЭУ-аас Монгол улсад суугаа Элчин сайд М.П.Сингх, ИГУҮТ-ийн Соёлын мэдээллийн төвийн захирал Проф. Пратапананд Жха, Соёл судлалын олон улсын төвийн захирал Др. Аашиш Бхаве нар оролцлоо.
Харилцан ойлголцлын санамж бичгийн хүрээнд талууд дараах үндсэн чиглэлээр хамтран ажиллах юм. Үүнд:
- Индира Гандийн Урлагийн Үндэсний Төвөөс зохион байгуулдаг оюутны хөтөлбөрт оролцох
- ИГУҮТ-ийн номын сан, архивын эх сурвалж, материалыг ашиглах
- ИГУҮТ-ийн судлаачид оюутны төгсөлтийн ажилд зөвлөх, удирдагчаар ажиллах
- Хамтарсан судалгаа хийх
- Хамтарсан хурал, лекц, семинар, хэлэлцүүлэг, үзэсгэлэн зохион байгуулах
- Эрдэм шинжилгээний цахим эх сурвалжийг хөгжүүлэх
- Санскрит хэл, буддын эх сурвалжийн судалгаа, вед судлал, орчуулга зүй, аман түүх, ардын аман зохиол, уламжлалт мэдлэг ухааны судалгааг хамтран хийнэ.
Индира Гандийн Урлагийн Үндэсний Төв “Судар бичгийг хамгаалах хөтөлбөр”-ийн хүрээнд Монгол Ганжуурын 108 ботийг дахин хэвлэж МУИС-ийн Философи, шашин судлалын тэнхимд хүлээлгэн өгөв.
