МУИС-ийн захирлын үүрэг гүйцэтгэгч, доктор Д.Бадарч Японы Кюүшү их сургуулийн ХЗС-ийн дэд захирал Проф, Minoru TOKUMOTO, Японы ХЗЯ, Судалгаа, сургалтын хүрээлэнгийн Олон улсын хамтын ажиллагааны газрын Засгийн газрын өмгөөлөгч, Проф Minako SHOJI, Япон улсын Хууль зүйн яамны Судалгаа, сургалтын хүрээлэнгийн Олон улсын хамтын ажиллагааны газрын Гадаад харилцааны дэд захирал Shiro OKUBO, Япон улсын Хууль зүйн яамны Судалгаа, сургалтын хүрээлэнгийн ажилтан Ryusuke YUASА нарын бүрэлдэхүүнтэй төлөөлөгчдийг хүлээн авч уулзав. Уулзалтад ХЗС-ийн захирал Б.Амарсанаа, Эрдэм шинжилгээний хэлтсийн дарга С.Должин, ХАХ-ийн дарга Д.Бадамдаш, ХАХ-ийн ахлах мэргэжилтэн Б.Энхжаргал нар байлцлаа.
Япон Улсын Хууль зүйн яам (ХЗЯ)-ны Олон улсын хамтын ажиллагаа, сургалт, судалгааны газар (ICD) нь Монгол Улсын ХЗДХЯ, МУИС-ийн ХЗС-тай байнгын хамтын ажиллагаатай бөгөөд Монгол Улсад Арилжааны хуулийг боловсруулах талаар “Хамтарсан судалгаа”-ний төслийг хэрэгжүүлж байгаа. Тус хамтарсан судалгааны төслийн хүрээнд 2018, 2019 онуудад МУИС-ийн ХЗС-ийн эрдэмтэн багш нар, ХЗДХЯ-ны төлөөлөл, Шүүхийн төлөөллүүдийг оролцуулаад 2 удаа биечлэн Япон Улсын ХЗЯ-нд сургалтыг зохион байгуулж, Японы ХЗЯ-аас багагүй хэмжээний төсөв санхүүгийн дэмжлэг туслалцаа үзүүлж ирсэн. Түүнчлэн 2021, 2022 онуудад 2 удаагийн цахим хэлбэрээр “Арилжааны эрх зүйн семинар”-г зохион байгуулсан. Тус хүрээндээ 2022 оны 10 дугаар сарын 26-нд МУИС-ийн ХЗС-тай хамтран Японы Арилжааны эрх зүйн 3 дахь удаагийн семинарыг зохион байгуулахаар хүрэлцэн ирээд байна.
Япон улсын Кюүшүгийн их сургуулийн ХЗС нь МУИС-ийн ХЗС–тай 2019 онд, Шинжлэх ухааны сургууль нь МУИС-ийн Шинжлэх ухааны сургуультай 2017 онд оюутан солилцох, хамтран ажиллах гэрээ байгуулан ажиллаж байна. Цаашдаа хамтын ажиллагааг өргөжүүлэх, хөгжүүлэх талаар уулзалтын талууд санал хүсэлтээ харилцан илэрхийлсэн уулзалт боллоо.
ХАМТЫН АЖИЛЛАГААНЫ ХЭЛТЭС
