Улс тунхагласан баярын өдрөөр Монгол Улсын Ерөнхийлөгч Ц.Элбэгдорж зарлиг гаргаж МУИС-ийн нэр бүхий багш эрдэмтдэд Төрийн соёрхол хүртээлээ. Энэхүү нэр хүндтэй шагналаар МУИС-ийн МКС-ийн Хэрэглээний математикийн тэнхмийн зөвлөх профессор Т.Жанлав, Математикийн хүрээлэнгийн захирал, профессор Р.Энхбат, Математикийн хүрээлэнгийн ажилтан, доктор Ч.Алтаннар, Цөмийн судалгааны төвийн секторын эрхлэгч, Шинжлэх ухааны доктор О.Чулуунбаатар нарыг шагнасан юм. Математикийн шинжлэх ухааны тооцон бодох математик, оновчлолын онолын салбарт шинэ чиглэл, хандлагыг үүсгэн хөгжүүлсэн “Ньютон төрлийн аргууд, хэрэглээ”, “Парето оновчлол, тоглоомын онол ба тэнцвэрийн онол”, “Тооцон бодох физикийн шинэ аргууд, хэрэглээ” болон “Квазигүдгэр программчлал, түүний хэрэглээ” хэмээх цогц бүтээл туурвисан нь дэлхий дахинд оюуны томоохон хөрөнгө оруулалт болсныг үнэлж ийнхүү шагнасан байна. Төрийн соёрхол хүртсэн багш нарыг МУИС-ийн удирдлагууд хүлээн авч уулзаж баяр хүргэсэн юм.
Дэлхий дахинд эх орныхоо нэрийг дуургасан математикчдадаа баяр хүргэж ажлын амжилт хүсье.
