Японы Атомын Энергийн Комиссын дарга, доктор Уесака Мицуру нь Монгол Улсад зохион байгуулагдаж буй Азийн Цөмийн Хамтын Ажиллагааны Форумын Сайд нарын түвшний 23 дугаар ээлжит хуралдаанд оролцов.
Энэхүү форумын үеэр ноён Уесака Мицуру болон Японы атомын энергийн комиссын төлөөлөгчид МУИС-ийн ХШУИС-ийн Хими, биологийн инженерчлэлийн тэнхим, Цөмийн физикийн судалгааны төвийн багш, судлаачдын төлөөлөлтэй уулзан мэдээлэл хийж санал солилцсон юм.
Ноён Уесака Мицуру нь Япон улсын цөмийн энергийн салбарт хэрэгжүүлж буй бодлого, үйл ажиллагааны төлөвлөгөө, хүний нөөц, цөмийн эрчим хүч, цөмийн цацрагийг анагаах ухаанд хэрэглэх, цөмийн шинжлэх ухааныг олон нийтэд танилуулах, өөрсдийн туршлагыг танилцууллаа. Мөн тэрээр Япон улс болон дэлхий нийтэд анагаах ухааны салбарт цөмийн цацрагийн хэрэглээ, эмчилгээ, оношлогоо, эмийн үйлдвэрлэл хэрхэн хөгжиж буй талаар онцгойлон ярилаа.
Уулзалтын үеэр Цөмийн физикийн судалгааны төвийн захирал, доктор Д.Болортуяа төвийн үйл ажиллагаагаа, хүний нөөц, хэрэгжүүлж буй төсөл, судалгааны ажлын талаар ирсэн зочдод танилцууллаа. ЦФСТ-ийн судлаачид Япон улсын атомын энергийн комиссын хэрэгжүүлдэг цацрагийн хэрэглээ, судалгааны реакторын хэрэглээ, цацрагийн хамгаалалтын төслүүд болон хүний нөөцийг бэлтгэх, чадавхжуулах урт, богино хугацааны сургалтуудад тогтмол хамрагддаг.
Цөмийн инженерчлэл хөтөлбөрийн багш дэд профессор С.Одмаа сургалтын орчин, сургалтын хөтөлбөр, өөрийн багийн гүйцэтгэж буй цөмийн эрчим хүчний реакторын голомтын дизайны судалгааны талаар тодорхой мэдээлэл өгөв.
МУИС, ШУС-ийн профессор Ц.Амартайван полимер материалыг цөмийн цацрагаар шарж чанарыг нь сайжруулах чиглэлийн судалгааны ажлыг хамтран хэрэгжүүлэх, хүний нөөцийг хөгжүүлэх талаар санал солилцов. Ийм бүтээгдэхүүн нь бороо байгатай үед суулгацын үрслэх хугацааг хурдасгах, улаан буудай, хүнсний ногооны гарцыг нэмэгдүүлэх боломжтой ажээ.
