Монгол Улсын Ерөнхийлөгчийн зарлигаар олон улсын олимпиадад Монголын багийг ахалж оролцсон төлөөлөлд төрийн дээд одон, медаль хүртээснийг өнөөдөр /2022.11.25/ Монгол Улсын Ерөнхийлөгчийн Боловсрол, шинжлэх ухаан, технологийн бодлогын зөвлөх Ч.Лодойравсал гардууллаа.
Хөдөлмөрийн гавьяаны улаан тугийн одонгоор В.Батцэнгэл /МУИС-ийн Газарзүйн тэнхим, Газарзүйн олимпиадын хороо/, Хөдөлмөрийн хүндэт медалиар Б.Батбаясгалан /МУИС-ийн Хэрэглээний математикийн тэнхим, Математикийн олимпиадын хороо/, Ү.Отгонбаяр /Математикийн хүрээлэн, Математикийн олимпиадын хороо/, Г.Мөнхбаяр /МУИС-ийн Физикийн тэнхим, Физикийн олимпиадын хороо/, Ч.Нямгэрэл /МУИС-ийн Химийн тэнхим, Химийн олимпиадын хороо/, Д.Нарангарвуу /МУИС-ийн Биологийн тэнхим, Биологийн олимпиадын хороо/ нарыг тус тус шагналаа.
2021 онд Монголын баг 15 медальт байр, 3 тусгай байр эзэлсэн бол, 2022 онд олон улсын таван төрлийн олимпиадад 23 сурагч оролцон 17 медаль хүртэж, хоёр тусгай байр эзэлсэн байна. Монгол Улсын Ерөнхийлөгч монгол хүний оюун ухааны үнэлэмжийг дээшлүүлж, олон улсын түвшинд шинжлэх ухааны мэдлэгээр өрсөлдөх чадварыг хөхиүлэн дэмжиж, олон улсын олимпиадад сурагчдыг оролцох нөхцөлийг бүрдүүлэх, урамшуулахаар 2021 оны 08 дугаар сарын 27-ны өдөр Засгийн газарт чиглэл өгөх тухай зарлиг буулгасан юм.
