Өнөөдөр /2022.12.13/ МУИС-ийн Багш, оюутанд үйлчлэх төвийн барилгын ажлыг гүйцэтгэсэн “Сити Ланд марк” ХХК, “Хаппи бьюлдинг” ХХК-ийн удирдлагууд Барилга байгууламжийг ашиглалтад оруулах улсын комиссын дүгнэлт болон барилгын түлхүүрийг МУИС-ийн захирлын үүрэг гүйцэтгэгч Д.Бадарчид хүлээлгэн өглөө.
Энэ үеэр МУИС-ийн захирлын үүрэг гүйцэтгэгч Д.Бадарч “Монгол Улсын Их Сургууль өөрийн хөрөнгөөр Багш, оюутанд үйлчлэх төвийн барилгыг бариулсан нь алсын хараатай алхам болсон. Дэлхий нийтийн дээд боловсролын чиг хандлага бол оюутан төвтэй байх. Тиймээс манай сургууль Монгол Улсын дээд боловсролын манлайлагч их сургуулийн хувьд анх удаа оюутанд үйлчлэх бие даасан төвтэй болж буй нь бусад сургуулиуддаа зөв манлайлал үзүүлж буй хэрэг. Энэ төв манай оюутан залуучуудын очих дуртай газар болно гэдэгт итгэлтэй байна” гээд барилгын ажлыг гүйцэтгэсэн компанийн хамт олонд талархал илэрхийллээ.
