МУИС-ийн төгсөх түвшний суралцагчдад зориулан Монголын топ аж ахуйн нэгж, байгууллагуудын танилцуулга, цагийн болон байнгын ажлын байранд зуучлах зорилготой “JOB FAIR-2023” ажлын байрны өдөрлөг 2 өдрийн турш зохион байгуулагдаж амжилттай өндөрлөлөө.
Өдөрлөгийг нээж МУИС-ийн Оюутны хөгжил эрхэлсэн захирал Г.Галбаяр үг хэлж, “NUM CAREER” болон Франкофон төвийн хамтын ажиллагааны хүрээнд тус төвийн захирал Б.Алтангүл оролцож мэндчилгээ дэвшүүлэв. Өдөрлөгийн 2 дахь өдөр буюу 2023.04.06-ны өдөр нийт ажил олгогч байгууллагуудын хүний нөөцийн мэргэжилтнүүдтэй чөлөөт уулзалт зохион байгуулж санал солилцсон юм. Тус уулзалтаар МУИС-ийн оюутны хөгжил эрхэлсэн захирал Г.Галбаяр ажил олгогчидтой хамтран ажиллах цаашдын хамтын ажиллагааны талаар ярилцлаа.
Уулзалтын үеэр хамтран ажиллагч байгууллагуудын хүний нөөцийн менежрүүдэд зориулан Оюутны хөгжлийн төвийн эрхлэгч М.Эрдэнэчимэг ажил олгогчдод “NUM CAREER” үйлчилгээний талаарх товч танилцуулгыг хүргэж, Бизнесийн сургуулийн Менежментийн тэнхимийн профессор Б.Цэцэгмаа “Хүний нөөцийн орчин үеийн чиг хандлага” сэдвээр лекц, сургалт зохион байгуулав.
Өдөрлөгийн үеэр МУИС-ийн суралцагчдыг ажлын байранд зуучлах зорилго бүхий шинээр нэвтрүүлж буй платформ https://career.num.edu.mn/ цахим хуудсыг оюутнууд болон ажил олгогчдод танилцуулсан нь энэ удаагийн ажлын байрны өдөрлөгийн онцлог ажил байлаа.
Ажлын байрны үзэсгэлэнд Монголын топ 52 аж ахуйн нэгж хамрагдсан бөгөөд үүнээс 30 байгууллага өдөрлөгт ирж оролцсон бол 22 байгууллага нь WORKI платформоор дамжуулан цахим хэлбэрээр оролцсон. 2 өдөр үргэжилсэн өдөрлөгийн үеэр нийт 400 гаруй ажлын байрны анкет бүртгэгджээ.
