“Даяаршлын үеийн хэвлэл мэдээлэл ба олон нийтийн харилцаа” (Global media and Mass communication) олон улсын эрдэм шинжилгээний хурал тавдугаар сарын 25-нд МУИС-ийн Номын санд боллоо. Хуралд Монгол, Америк, Их Британи, Герман, Итали, Дани, Унгар, Хятад, Орос, Энэтхэг, Антигуа ба Барбуда улсын их дээд сургуулийн эрдэмтэн судлаачид оролцож, илтгэлээ танилцуулав. Тэд өнөөгийн хэвлэл мэдээллийн орчин, өөрчлөгдөж буй чиг хандлага, сэтгүүлчийн үйл ажиллагаан дахь технологийн онцлог, шийдлийн сэтгүүл зүйн арга, хэрэглээ, цахим сэтгүүл зүйн хөгжил, нийгмийн сүлжээний нөлөө зэрэг асуудлаар нийт 15 илтгэл хэлэлцүүллээ. Хурал танхим болон онлайнаар зохион байгуулагдав. Хэвлэл мэдээллийн салбарын сүүлийн үеийн чиг хандлагатай танилцах, олон орны эрдэмтдийн хамтын ажиллагааны сүлжээ үүсгэх, арга туршлага солилцох зорилготой тус хурал анх удаагаа болж байна.
“Даяаршлын үеийн хэвлэл мэдээлэл ба олон нийтийн харилцаа” олон улсын эрдэм шинжилгээний хурлыг Монгол Улсын Их Сургууль, Авлигатай тэмцэх газар, Монгол Улсын Боловсролын Их Сургууль, Соёл Урлагийн Их Сургуулийн Радио, телевиз, медиа урлагийн сургууль, “Отгонтэнгэр” их сургууль хамтран зохион байгуулав.
