Монголын хүрээлэн буй орчны инженер мэргэжилтнүүдийн нийгэмлэг нь байгаль орчны мэргэжилтнүүдийг чадавхжуулах, шинжлэх ухааныг хөгжүүлэх, сурталчлах чиглэлээр үйл ажиллагаа явуулдаг нийгэмд үйлчилдэг сургалт, эрдэм шинжилгээ, судалгааны ашгийн бус байгууллага бөгөөд Монгол Улсын Их сургуультай хамтран Хүрээлэн буй орчны инженерчлэл хөтөлбөрөөр суралцаж буй бакалаврын түвшний суралцагчдад сурч боловсрох, судалгаа шинжилгээний ажил гүйцэтгэх, өөрийгөө хөгжүүлэхэд дэмжлэг үзүүлэх, урамшуулах зорилгоор тэтгэлэгт хөтөлбөрийг хэрэгжүүлэн тэтгэлгийг гурав дахь жилдээ олгож байна.
2022-2023 оны хичээлийн жилд энэхүү хөтөлбөрийн хүрээнд нийт дөрвөн суралцагч хүсэлт ирүүлсэн. МУИС-ийн захирлын 2023 оны тавдугаар сарын 09-ний А/194 тоот тушаалаар ажлын хэсэг байгуулагдаж, суралцагчдын сурлагын амжилт, судалгаа шинжилгээ, эссэ, нийгмийн идэвх оролцоо, урлаг спортын амжилтыг шалгуур болгон үзэж нэг суралцагчийг шалгарууллаа.
Шалгаруулалтад Хүрээлэн буй орчны инженер хөтөлбөрийн III түвшний суралцагч Б.Сувд-Эрдэнэ шалгарч тэтгэлгийг хүлээн авлаа.
Энэ удаагийн тэтгэлгийн батламж гардуулалт 2023 оны 06 дугаар сарын 02-ны өдөр МУИС-ийн номын сангийн 502 тоот хурлын танхимд (09:30 цагт) “ДЭЛХИЙН ХҮРЭЭЛЭН БУЙ ОРЧНЫ ӨДӨР 2023” Хүрээлэн буй орчны инженерчлэл оюутны эрдэм шинжилгээ, онол практикийн VI бага хурлын нээлтийн үеэр Монголын хүрээлэн буй орчны инженерийн холбооны гүйцэтгэх захирал А.Жавхлан, Хүрээлэн буй орчин, ойн инженерчлэлийн тэнхимийн багш, дэд профессор Т.Энхдөл нар тэтгэлэгт шалгарсан суралцагчид баяр хүргэж тэтгэлгийн батламжийг гардуулан өглөө. 
Оюутны хөгжлийн төв
