Үндэсний их баяр наадмын өмнө боловсрол, шинжлэх ухааны салбарт олон жил үр бүтээлтэй ажиллаж, хөдөлмөрөөрөө тэргүүлсэн МУИС-ийн багш нар төрийн дээд цол, одонгоор шагнууллаа. МУИС-ийн удирдлага, хамт олон гавьяат цол, одон хүртсэн багш нарыг хүлээн авч, хүндэтгэл үзүүлэв.
Монгол Улсын Ардын багш цолоор Химийн тэнхимийн ахмад багш Д.Дорж, Монгол Улсын Ардын багш цолоор Биологийн тэнхимийн ахмад багш Т.Гун-Аажав, Монгол Улсын Гавьяат багш Физикийн тэнхимийн ахмад багш Ц.Ганцог, Монгол Улсын Гавьяат багш Физикийн тэнхимийн ахмад багш М.Ганбат, Алтан гадас одонгоор Гадаад хэлний төвийн ахлах багш Л.Үүлэнсолонго нарыг шагнажээ.
Түүнчлэн Химийн тэнхимийн ахмад багш Н.Даваажавт Хөдөлмөрийн гавьяаны улаан тугийн одон хүртээснийг МУИС-ийн захирал Д.Бадарч гардуулав.
Энэ үеэр, доктор, профессор Д. Бадарч үг хэллээ. Тэрбээр, “МУИС-ийн хөгжилд мэдлэг, оюун ухаанаа шингээсэн эрхэм багш нар улсын их баяр наадмын өмнө төрийн дээд шагнал хүртсэнд МУИС-ийн удирдлага, хамт олны зүгээс баяр хүргэе. Өнгөрсөн жил ЖАЙКА-ын Ерөнхийлөгч А.Танака манай сургуульд айлчлах үеэрээ, МУИС-ийн байгалийн шинжлэх ухааны суурь боловсрол дэлхийн түвшинд хүрсэн гэдгийг тэд хүлээн зөвшөөрдөг болохоо хэлж байсан. Энэ бол та бүхний хөдөлмөрийн үр дүн” гэдгийг онцлоод, талархал илэрхийллээ.
Төрийн дээд цол, одонгоор шагнуулсан багш нартаа аз жаргал, эрүүл энхийг хүсэн ерөөе.
ЗАХИРЛЫН АЖЛЫН АЛБА
