Япон Улсын Засгийн газрын Хөгжлийн албан ёсны тусламж (ODA)-ийн “Соёлын өвсний үндэс” хөтөлбөрийн хүрээнд “Монгол Улсын Их Сургуулийн япон хэлний хэлмэрчлэхүйн лаборатори байгуулах төсөл”-ийн нээлтийн үйл ажиллагааг 2023 оны аравдугаар сарын 20-ны өдөр зохион байгууллаа. 
Нээлтэд Япон Улсаас Монгол Улсад суугаа Онц бөгөөд Бүрэн эрхт Элчин сайд Кобаяши Хироюки, МУИС-ийн захирал Д.Бадарч болон холбогдох төлөөний хүмүүс оролцлоо. Энэхүү төслөөр МУИС-ийн нэг ангийг япон хэлний хэлмэрчлэхүйн лаборатори болгон засварлахын хамт орчуулагчийн ур чадвар эзэмшихэд шаардлагатай тоног төхөөрөмжийг нэвтрүүлснээр япон хэлийг сонгон мэргэшиж буй оюутнуудад бодитоор, үр дүнтэй хичээллэх нөхцөл бүрдэх юм.
ШУС-ийн удирдлагын зүгээс уг төслийг амжилттай хэрэгжих нөхцөл бололцоог хангасан ба анги танхим гаргах, засвар, тохижилтыг бүрэн шийдвэрлэхэд идэвх санаачлагатай, хамтран ажиллажээ.
Энэ үеэр Элчин сайд Х.Кобаяши мэндчилгээ дэвшүүлж хэлсэн үгэндээ “Японы ард түмнээс өгч буй бэлэг болох энэ лабораториос монгол, япон хэлний орчуулагчдыг аль болох олныг төрүүлж, хоёр орны харилцааны хөгжилд хувь нэмрээ оруулахыг хүсье” хэмээв.
МУИС-ийн захирал Д.Бадарч, “Орчин үеийн технологи бүхий лаборатори нь япон хэл сурч буй оюутан залуучууд болон япон судлалыг Монголд дэлгэрүүлж буй эрдэмтэн багш нарт маш их боломжийг нээж өглөө. Энэ бол Монгол Япон хоёр орны цаашдын хамтын ажиллагааг улам өргөжин бэхжих үндэс суурийг тавихад үнэтэй хувь нэмэр оруулна гэдэгт итгэл төгс байна” гэлээ.
Төслийн хүрээнд уг лабораторид дэлхийд орчуулгын системээрээ тэргүүлэгч “Bosch” брэндийн хамгийн сүүлийн үеийн төхөөрөмжийг суурилуулжээ.
