“Хотын байгальд суурилсан шийдэл, ногоон-цэнхэр дэд бүтэц, амьдрахад таатай хот” сэдэвт олон улсын лекцийг зохион байгууллаа

2023-10-26

Европын Холбооны ERASMUS+ хөтөлбөрийн санхүүжилтээр “Энэтхэг ба Монгол улсын хот суурин газрын уур амьсгалын өөрчлөлтийг тэсвэрлэх чадвар, түүнд дасан зохицох байдал – URGENT” төсөл хэрэгжиж байгаа билээ. “URGENT” болон Европын Холбооны Jean Monnet хөтөлбөрийн санхүүжилттэй “Монгол Улсын хүрээлэн буй орчны тогтвортой менежментэд Европын туршлагаас нэвтрүүлэх нь – ONE” төслийн хүрээнд олон улсын нээлттэй лекц боллоо. Энэхүү лекцийг төслийн хамтрагч байгууллага болох МУИС “Хотын байгальд суурилсан шийдэл, ногоон-цэнхэр дэд бүтэц, амьдрахад таатай хот” сэдвийн хүрээнд Улаанбаатар хотод 2023 оны аравдугаар сарын 11-ний өдөр зохион байгуулжээ.

Тус нээлттэй лекцэд таван улсын (Эстони, Герман, Монгол, Энэтхэг, Итали) таван их сургуулийн профессорууд дараах сэдвүүдээр лекц уншлаа. Үүнд:

Anton Shkaruba Эстонын хөдөө аж ахуйн их сургууль, Эстони Улс

Лекцийн сэдэв: Хот суурин газар дахь экосистемийн эерэг ба сөрөг үйлчилгээ

Arjan de Groot Мартин-Луферийн их сургууль, ХБНГУ

Лекцийн сэдэв: Байгальд суурилсан шийдлийн тухай ойлголт, хэрэглээний талбар

Ochir Altansukh Монгол улсын их сургууль, Монгол Улс

Лекцийн сэдэв: Байгальд суурилсан шийдлийн төрлүүд ба олон улсын мэдээллийн сан

Joshi Pawan Kumar Жавахарлал Нехру их сургууль, БНЭУ

Лекцийн сэдэв: Амьдрахад таатой хот

Daniele La Rosa Катанын их сургууль, Итали улс

Лекцийн сэдэв: Уур амьсгалын онцлогт тохируулж хотын ногоон байгууламжийг сайжруулах төлөвлөлтийн шалгуурууд

Уг нээлттэй лекцийн зорилго нь хотын ногоон-цэнхэр байгууламж, байгальд суурилсан шийдэл, хот төлөвлөлт, амьдрахад таатай хотыг хөгжүүлэхэд шинжлэх ухааны ойлголт, судалгааг ашиглах талаар олон нийтийг мэдлэгжүүлэх, мэдээлэл түгээхэд оршино.

Төслийн цахим хуудас: https://urgent-project.net/

Төслийн Facebook хуудас: https://www.facebook.com/groups/urbangreenblue