Монгол судлалын бүх чиглэлээр ажиллах, Монгол судлалыг хөгжүүлэхэд гадаад, дотоодын суралцагчдын судалгаа шинжилгээг хөхүүлэн дэмжих, залгамж үеэ бэлдэх, тэдэнд урам зориг төрүүлэхэд тэтгэлгийн зорилго оршино. Уг тэтгэлгийг МУИС-ийн ШУС-ийн Хүмүүнлэгийн ухааны салбарын Ази судлалын тэнхимийн ахлах багш Б.Дулмаа, түүний гэр бүлийн хүн болох “Корнерпойнт” ХХК-ийн захирал С.Болдбаатар нар санаачлан МУИС-ийн Монгол хэлний хөтөлбөрт идэвхтэй суралцаж буй гадаад, дотоодын бакалаврын болон ахисан түвшний суралцагч нарт олгодог бөгөөд нийт 17 суралцагчдад зургаа дахь жилдээ тэтгэлэг олгож байна.
“Монгол судлал-Залгамж үе” тэтгэлгийн батламж гардуулах ёслол 2024 оны тавдугаар сарын 27-ны өдөр МУИС-ийн Багш, оюутны хөгжлийн төв байрны 502 тоот танхимд боллоо. Ёслолын ажиллагаанд МУИС-ийн Оюутны хөгжил эрхэлсэн проректор Г.Галбаяр, Оюутны хөгжил, бодлогын газрын дарга В.Дашдаваа, Оюутны хөгжлийн төвийн эрхлэгч М.Эрдэнэчимэг, “Корнерпойнт” ХХК-ийн захирал С.Болдбаатар, ХУС-ын Ази судлалын тэнхимийн ахлах багш Б.Дулмаа, С.Чулуунбат ХУС-ын Монгол хэл, хэл шинжлэлийн тэнхимийн эрхлэгч Т.Эрдэнэ-Очир, Монгол хэл, хэл шинжлэлийн тэнхимийн профессор Т.Отгонтуул нар суралцагчдад баяр хүргэн тэтгэлгийн батламжийг гардуулан өглөө.
Ёслолын арга хэмжээг нээж МУИС-ийн Оюутны хөгжил эрхэлсэн проректор Г.Галбаяр үг хэлж, тэтгэлгийн зорилго, үйл ажиллагааны талаар товч танилцуулан цаашдын ажил үйлс, эрдмийн их үйлст амжилтыг хүслээ. Тэрбээр хэлэхдээ, “МУИС-ийн хэмжээнд 50 гаруй төрлийн тэтгэлгийг оюутан залууст олгодог бөгөөд түүний нэг нь “Монгол судлал-Залгамж үе” юм. Аливаа улсад үндэсний хэл, эрдэм шинжлэл судлал гэдэг бол чухал асуудал. Төр засгийн зүгээс болон МУИС-ийн зүгээс ч монгол судлалд онцгой анхаарал хандуулж ирсэн билээ. Энэхүү тэтгэлгийг санаачилсан “Корнерпойнт” ХХК-ийн захирал С.Болдбаатар, түүний гэр бүлийн хүн болох Ази судлалын тэнхимийн ахлах багш Б.Дулмаа нарт МУИС-ийн нэрийн өмнөөс талархаж байгаагаа илэрхийлж байна.” гэлээ.
Мөн ёслолын арга хэмжээгээр “Корнерпойнт” ХХК-ийн захирал С.Болдбаатар мэндчилгээ дэвшүүллээ. Тэрбээр, “Манай гэр бүлийн хүн монгол судлалаар сурч байгаа дотоод, гадаадын монгол судлаачдыг дэмжин тэтгэлэгт хөтөлбөрийг санаачлан, найз нөхөд болон компаниудтай хамтарч тэтгэлэг олгоё гэдэг санаа гараад тав дахь жилдээ олгож байна. Энэ хугацаанд Өвөр монгол, ОХУ, Хойд Солонгос, Горно-Алтай, дотоодын бакалавр, магистр, докторын суралцагчдад өөрийнхөө зохих хэмжээгээр тасалдуулахгүй олгохыг хичээж байна. Тэтгэлэг авсан оюутнууддаа захиж хэлэхэд, Улс гүрэн өөрийн гэсэн хэл, соёлгүй бол орших үндэсгүй. Тиймээс төрөлх хэлээ гүнзгийрүүлэн судалж буй магистрант Баднаа-Ундрамдаа эрдэм судлалын үйлст нь улам их амжилтыг хүсье.” хэмээлээ.
2023-2024 оны хичээлийн жилийн тэтгэлэгт ШУС-ийн ХУС-ын Хэл шинжлэл (Монгол хэл) магистр хөтөлбөрийн суралцагч Б.Баднаа-Ундрам, Монгол хэлний бэлтгэл дунд шатны хөтөлбөрт суралцагч Горно-Алтайн Яданова Кузелеш Владимировна нар шалгарч тэтгэлгийн батламжийг гардан авлаа.
Тэтгэлэг гардан авсан суралцагч Б.Баднаа-Ундрам “Корнерпойнт” ХХК-ний хамт олонд хандан талархлаа илэрхийлж үг хэллээ.
Монгол хэл, хэл шинжлэлийн тэнхимийн эрхлэгч Т.Эрдэнэ-Очир тэтгэлэг гардаж авсан оюутнуудад баяр хүргэж үг хэлэхдээ, “Юун түрүүнд, тэтгэлэгт материалаа ирүүлж, сонгон шалгаруулалтад тэнцэж, тэтгэлэг хүртэхээр болсон оюутнууд Та бүхэндээ баяр хүргэж, сурах их үйлсэд тань улам их амжилт хүсье. “Монгол судлал-Залгамж үе” тэтгэлгийг санаачилж, манай сургуулийн Монгол судлалаар суралцаж байгаа монгол болон гадаад оюутнуудыг дэмжин, тус тэтгэлгийг сүүлийн жилүүдэд тогтвортой олгож байгаа “Корнерпойнт” ХХК-ийн захирал С.Болдбаатар танд чин сэтгэлээсээ талархаж байгаагаа илэрхийлье. Та бүхний мэдэж байгаачлан МУИС-д гадаадын олон оюутан суралцдаг. Тэдний олонх нь манай тэнхимийн монгол хэлний бэлтгэл ангийг дүүргэж, үргэлжлүүлэн Монгол судлал, монгол хэл, хэл шинжлэлийн чиглэлээр бакалавр, магистр, докторын түвшинд суралцдаг билээ. МУИС-ийн судалгааны нэгэн гол чиглэл нь Монгол судлал бөгөөд дотоодод төдийгүй олон улсын түвшинд хөгжүүлэхэд энэ чиглэлээр суралцаж байгаа оюутныг дэмжиж энэ мэт тэтгэлэгт хөтөлбөрүүд маш чухал үүрэгтэй. МУИС-ийн ОХТ-ийн хамт олон энэ талаар санаачилгатай ажиллаж, тэтгэлэгт горилогч нарыг шударгаар сонгон шалгаруулах, оюутны тэтгэлэгт хөтөлбөрүүдийг олшруулахын тулд мэргэжлийн тэнхимүүдтэйгээ нягт хамтран ажиллаж буйд баяртай байна. Та бүхэнд баярлалаа. Бид ч мөн монгол хэлний бэлтгэл хөтөлбөр, бакалавр, магистрын түвшний тэтгэлэгт хөтөлбөрүүдийг нэмэгдүүлэхэд бодлогын түвшинд анхаарч ажиллах болно. “Монгол судлал-Залгамж үе” тэтгэлгийн энэ удаагийн шалгаруулалтад тэнцэж тэтгэлэг хүртэж буй Монгол хэл, хэл шинжлэлийн тэнхимийн хэлний бэлтгэл ангийн оюутан, ОХУ-ын Алтайн Бүгд Найрамдах Улсын иргэн Кузелеш Ядан болон хэл шинжлэлийн магистрын хөтөлбөрийн магистрант Б.Баднаа-Ундрамд баяр хүргэж, эрдэм судлалын их амжилтыг хүсэн ерөөе.” хэмээв.
Тэтгэлэг хүртсэн суралцагчдадаа цаашдын эрдэм судлалын ажилд нь өндөр амжилтыг хүсэн ерөөе.
ОЮУТНЫ ХӨГЖЛИЙН ТӨВ
ТУС МЭДЭЭТЭЙ ХОЛБООТОЙ АСУУДЛЫГ МУИС-ИЙН ОЮУТНЫ ХӨГЖЛИЙН БОДЛОГЫН ГАЗАР ХАРИУЦНА
