Нобелийн 2007 оны Энхтайваны шагналт, доктор Ражендра К. Пачори 10-рын 9-ний өдөр МУИС-д зочилж, “Уур амьсгалын өөрчлөлт ба тогтвортой хөгжил” сэдвээр лекц уншлаа. НҮБ-ын төрөлжсөн байгууллага болох Уур амьсгалын өөрчлөлтийн асуудлаарх засгийн газар хоорондын мэргэжлийн бүлэг (IPCC)- ийн дарга, ноён Ражендра К. Пачори лекцэндээ байгалийн жамаар гэхээсээ илүү хүний үйл ажиллагааны нөлөөгөөр дэлхийн уур амьсгал өөрчлөгдөж байгаа болон энэхүү хувьсал нь улс орны эдийн засаг, хүн амын эрүүл мэнд, тэр дундаа байгаль орчин, экологийн тэнцвэрт байдалд хэрхэн сөргөөр нөлөөлж буйг олон жилийн судалгааны үр дүн, жишээ, тоо баримтаар тодорхой тусган үзүүлэв. Тэрбээр эртнээс ирэхийг хүсэж байсан Монгол оронд ийнхүү хөл тавьж, нүүр тулан уулзсандаа баяртай байгаагаа илэрхийлээд “Танай улс дэлхийн уур амьсгалын өөрчлөлтийн эсрэг өөрийн хувь нэмрээ оруулж чадна. Тодруулбал, Монгол орон байгалийн баялаг нөөцтэй улсын хувьд агаарт хорт элемент ихээр ялгаруулдаг энергийн эх үүсгэвэрийн уламжлалт технологиосоо татгалзаж, сэргээгдэх эрчим хүч, тэр дундаа нарны эрчим хүчийг түгээмэл ашиглаж, дотооддоо төдийгүй гадагш худалдаалах өргөн боломж харагдаж байна гэлээ. Энэ үеэр Ражендра К. Пачори-д даян дэлхийд энх тайван байдлыг цогцлооход үнэтэй хувь нэмэр оруулсан нийгэм, улс төрийн алдар хүндтэй зочинд олгодог МУИС-ийн “Хүндэт доктор” хэмээн эрхэм цолыг Эрдмийн зөвлөлийн хамт олон ёслол төгөлдөр өргөмжиллөө.
Сүүлийн жилүүдэд гол мөрөн, нуур цөөрмийн ус олноор ширгэж, жилийн дөрвөн улирлын хэв шинж алдагдаж, уур амьсгалын өөрчлөлтийн сөрөг нөлөөнд хүчтэй автаж буй манай орны хувьд энэ нь үнэхээр цагаа олсон хэрэг хэмээн судлаач эрдэмтэд лекцийн ач холбогдлыг өндөр үнэлж байна.
Энэтхэг улсын иргэн, ноён Ражендра К. Пачори 2002 оноос Уур амьсгалын өөрчлөлтийн асуудлаарх засгийн газар хоорондын мэргэжлийн бүлэг (IPCC)- ийн даргаар ажиллаж байгаа бөгөөд эдүгээ Йелийн Их Сургуулийн Уур амьсгал ба Эрчим хүчний дээд сургууль (YCEI)-ийн захирлын алба хашиж байна. Тэрбээр өнгөрсөн хугацаанд Үндэсний Хөдөө аж ахуйн Сан (NAF)-ийн Удирдах зөвлөлийн дарга, Колумбийн Их Сургуулийн Уур амьсгал ба Нийгмийн Олон улсын судлалын дээд сургуулийн Төлөөлөн удирдах зөвлөлийн дарга, Олон улсын Нарны эрчим хүчний холбоо, Дэлхийн нөөцийн Институтын зөвлөлийн гишүүн, Дэлхийн Эрчим Хүчний Зөвлөлийн дарга, Эрчим хүчний эдийн засгийн Олон улсын холбооны Ерөнхийлөгчийн албыг хашиж ирсэн туршлагатай, төр нийгмийн зүтгэлтэн төдийгүй олонд танигдсан судлаач эрдэмтэн юм. Ражендра К. Пачори нь уур амьсгалын өөрчлөлтийг ойлгохтой холбогдсон мэдээлэлд үнэлэлт дүгнэлт өгөх, үүнийг олон нийтэд суртчилан таниулах, дэлхийн дулаарлын эсрэг улс орон бүр өөрийн хувь нэмрээ оруулах үзэл санааг бий болгон төлөвшүүлэхэд идэвхийлэн ажиллаж буй аж.
