МУИС-ийн МТС-ийн багш Б.Ганбат 3D дүрс болон гурван хэмжээст технологийн судалгаагаараа шилдэг залуу, эрдэмтэнд олгодог Монгол улсын ерөнхийлөгчийн нэрэмжит 2011 оны шагналыг хүртлээ. Цахим технологийн хөгжилд оруулж буй хувь нэмрээ ийнхүү төр засгаараа үнэлүүлсэн залуу эрдэмтнээ МУИС-ийн захирал С.Төмөр-Очир хүлээн авч уулзан баяр хүргэж, цаашид инновацид чиглэсэн олон судалгаа хийхийг хүслээ.
Б.Ганбат судалгааныхаа чиглэлээр олон улсын эрдэм шинжилгээний сэтгүүл болон хурлуудад тогтмол өгүүллээ нийтлүүлж ирсний зэрэгцээ БНСУ-ын BK21 болон BIT сангуудын шилдэг бүтээл болон судлаачийн шагналыг таван удaa авчээ. Түүнчлэн тэрбээр 2010 онд зохиогдсон “Эрдэм Шинжилгээний Бүтээлийн үзэсгэлэн”- д Монголд анхны удаа 3D дэлгэц угсарч, “Шинжлэх Ухаан Технологийн үзэсгэлэн”-д “Нүдний шилгүй хардаг 3 хэмжээст дэлгэц”, Худалдаа Аж Үйлдвэрийн Танхимаас зохион байгуулсан “Шинжлэх Ухаан- Бизнесс- Залуу Үе-2011” үзэсгэлэнд “Агаарт гардаг болон 3-н хэмжээст дэлгэц” зэрэг бүтээлээрээ амжилттай оролцож байжээ.
