Монгол Улсын Их Сургууль байгуулагдсаны 70 жилийн ой энэ онд тохиож байгаа билээ. Энэхүү баярт ойн босгон дээр МУИС-ийн Математик, Компьютерийн Сургуулийн захирал Л.Алтангэрэлтэй ярилцлаа.
Өөрийнхөө тухай товч танилцуулахгүй юу?
– Би 1997 онд МУИС-ийн МКС-ийг математикч, математикийн багш мэргэжлээр төгсөж, 1999 онд сургуульдаа магистрийн, 2006 онд ХБНГУ-ийн Кемнитцийн Их Сургуульд оптимизацийн чиглэлээр математикийн ухааны докторын зэрэг хамгаалсан. 2009 оны 2-р сараас МКС-ийн захирлаар томилогдон ажиллаж байна.
Танай сургуулийн онцлог, давуу тал юу вэ?
– Манай сургууль анх байгуулагдсан цагаасаа эхлэн Монгол улсад математик сэтгэлгээг хөгжүүлэх, математикийн соёлыг түгээн дэлгэрүүлэхэд манлайлах үүрэгтэйгээр оролцсоор ирсэн. Үе үеийн олон сайхан багш нарын хүч хөдөлмөрийн үр дүнд өөрийн гэсэн онцлог, уламжлалыг хадгалсан өнөөгийн түвшинд хүрснийг тэмдэглэхэд таатай байна. Төгсөгчид маань дунд, дээд шатны сургууль, төрийн болон хувийн хэвшлийн байгууллагаас эхлээд төр, засгийн хариуцлагатай албыг хүртэл хашиж, улс орныхоо хөгжилд хувь нэмрээ оруулсаар явна. Анх улс орны тухайн үеийн хэрэгцээ шаардлагатай уялдуулан багшийн мэргэжлээр түлхүү мэргэжилтэн бэлтгэж эхэлсэн бол 1990-ээд оны эхнээс хэрэглээний салбар, мэдээллийн технологитой холбоотой чиглэлээр элсэлт авдаг болж, эдүгээ нийт 9 мэргэжлээр бакалаврын боловсрол олгох болон магистр, докторын шаталсан сургалтыг явуулдаг болсон.
Cургуулийнхаа хамт олны ололт амжилтаас дурьдвал?
– Сүүлийн 10 гаруй жилд 3 багш шинжлэх ухааны докторын зэрэг хамгаалснаас гадна Японд 6, ХБНГУ-д 2, БНСУ-д 2, ОХУ-д 3, МУИС-д 3 багш докторын зэрэг амжилттай хамгаалж, багш нарын судалгааны чиглэлийн хамрах хүрээ өргөжсөөр байна. Одоо 10 гаруй багш ОХУ, Япон, БНСУ, ХБНГУ зэрэг орнуудад судалгааны томилолтоор болон докторантурт суралцаж байна. Сургалтын стандарт, хөтөлбөрийг шинэчлэн боловсруулах, сургалтанд мэдээллийн технологийг нэвтрүүлэхэд анхааран ажиллаж ирсэн бөгөөд 2011 оны 6-р сард програм хангамжийн инженерийн бакалаврын хөтөлбөр үндэсний зөвлөлөөр магадлан итгэмжлэгдсэн. Сүүлийн 3 жилийн хугацаанд манай сургуулийн оюутнууд олон улсын оюутны математикийн олимпиадаас 1 алт, 2 хүрэл, 3 тусгай байрын шагнал, Азийн бүсийн оюутны програмчлалын багийн олимпиадаас багаараа 1 мөнгө, 2 хүрэл хүртсэн амжилтуудыг үзүүлээд байна.
Ойгоо угтаж ямар ажлуудыг хийхээр төлөвлөөд байна вэ?
– МУИС-ийн ууган салбаруудын нэг учраас манай сургуулийн 70 жилийн ой давхцаж байгаагаараа онцлогтой. МУИС-ийн болон МКС-ийн ой угтаж нэлээд ажлуудыг хийхээр төлөвлөөд, ажиллаж байна. Тухайлбал энэ сарын 23-нд их, дээд сургуулийн багш, судлаачдын дунд математик, компьютерийн ухааны эрдэм шинжилгээний хурлыг бусад их сургууль, хүрээлэнтэй хамтран зохион байгуулахаас гадна 4-р сард оюутны улсын математикийн болон програмчлалын багийн үндэсний, 5-р сард улсын математикийн болон мэдээлэлзүйн олимпиадуудыг МУИС-ийн нэрэмжит болгон зохион явуулна. Төгсөгчдийнхээ дэмжлэгийг авах, цаашид мэдээлэл солилцож, илүү ойр ажиллах зорилгоор фейсбүүкт сүлжээ үүсгэсэн. Энэ боломжийг ашиглаад энэ сургуульд хүч хөдөлмөрөө зориулж ирсэн ахмад багш, ажилтнууд, тэдний гэр бүл, үе үеийн төгсөгчиддээ сар шинийн мэнд хүргэж, эрүүл энх, сайн сайхан бүхнийг хүсэн ерөөе.
-Ярилцсанд баярлалаа
