Бээжингийн их сургуулийн Эдийн засгийн сургуулийн намын хорооны нарийн бичгийн дарга Чуй Жианхуа тэргүүтэй төлөөлөгчдийг МУИС-ийн захирал Я.Төмөрбаатар 2019 оны 6 дугаар сарын 14-ний өдөр хүлээн авч уулзав.
Зочид ОУХНУС, Өвөрмонголын их сургууль хамтран зохион байгуулж буй “Монгол Улс, БНХАУ-ын хооронд дипломат харилцаа тогтоосны 70 жилийн ой: өнгөрсөн, одоо, ирээдүй” сэдэвт эрдэм шинжилгээний хуралд оролцож илтгэл тавих, хоёр сургууль хоорондын хамтын ажиллагааг хэрхэн хөгжүүлэх талаар санал солилцох зорилгоор МУИС-д айлчилж байгаа билээ. Захирал Я.Төмөрбаатар хүрэлцэн ирсэнд нь зочдод талархал илэрхийлээд өнгөрсөн 4 дүгээр сард Боловсрол, соёл, шинжлэх ухаан, спортын яамны Төрийн нарийн бичгийн дарга Б.Баярсайхан тус сургууль дээр айлчилж Бээжингийн Их Сургуулийн Эдийн засгийн сургууль болон МУИС-ийн ОУХНУС хооронд хамтын ажиллагааны гэрээ байгуулахаар санал солилцож буйг дэмжсэн талаар дурдаад үргэлжлүүлэн МУИС-ийн талаар товч мэдээлэл өгөв.
Ноён Чуй Жианхуа Монгол Улсад анх удаа айлчлан ирж буйгаа хэлээд хүлээн авч уулзаж байгаад МУИС-ийн удирдлагад талархсанаа илэрхийлэв. Тэрээр БНХАУ-ын тэргүүлэгч их дээд сургуулийн нэг болох Бээжингийн их сургуулийн Эдийн засгийн сургуулийн талаар дэлгэрэнгүй мэдээлэл өгөөд тус сургуулийн эрдэмтэн, судлаачдын эх орныхоо эдийн засгийн хөгжилд оруулж буй өндөр хувь нэмрийг онцлон дурдав.
МУИС-ийн захирал Я.Төмөрбаатар эрдэм шинжилгээний хуралд хоёр улсын найрсаг харилцааны хөгжил дэх Бээжингийн их сургуулийн монгол хэл, соёлын мэргэжил болон Хятад, Монголын эрүүл мэндийн салбарын тулгамдсан асуудал гэсэн сэдвүүдээр илтгэл тавих профессор Жан Юньюнь болон Лю Динань нарт талархал илэрхийлээд эрдмийн ажилд нь амжилт хүсэв. Хоёр тал цаашид хамтран ажиллах өргөн боломж бий гэдэгтэй бүрэн санал нийлж буйгаа уулзалтын төгсгөлд илэрхийлэв.
Уулзалтад МУИС-ийн зүгээс Эрдэм шинжилгээ, хамтын ажиллагаа эрхэлсэн дэд захирал проф. Ч.Лодойравсал, ОУХНУС-ийн захирал Др. С.Баттулга, ХАХ-ийн дарга Ш.Мэндбаяр болон тус хэлтсийн ахлах мэргэжилтэн Б.Энхжаргал нар оролцлоо.
2019 оны 6 дугаар сарын 17-ны өдөр Бээжингийн их сургуулийн Эдийн засгийн сургууль болон МУИС-ийн ОУХНУС хооронд Эрдмийн солилцооны болон оюутан солилцооны гэрээ зурагдаж хоёр сургууль хоорондын хамтын ажиллагааг гэрээний хүрээнд хэрхэн хөгжүүлэх талаар санал солилцсон юм.
