МУИС-ийн 67 дахь хаврын төгсөгчид энэ сарын 13-ны өдөр эрдмийн баяраа тэмдэглэлээ. Төгсөгчдөдөө баяр хүргэж диплом гардуулах ёслолын үйл ажиллагаа Соёлын төв өргөөнд болж МУИС-ийн захирал С.Төмөр-Очир нээж үг хэлснээр эхэлсэн юм. Мөн МУИС-ийн Сургалт эрхэлсэн дэд захирал Р.Ринчинбазар, Эдийн засаг, хөгжлийн бодлогын асуудал эрхэлсэн дэд захирал Б.Даваасүрэн, Эрдэм шинжилгээ, инновацийн асуудал эрхэлсэн дэд захирал Ч.Ганзориг, Магистр докторын сургалтын албаны дарга М.Цогбадрах, Бакалаврын сургалтын албаны дарга Г.Цагаач болон бүрэлдэхүүн сургуулиудын захирлууд хүрэлцэн ирж төгсөгчдөдөө баяр хүргэлээ.
Энэ жил МУИС-ийн 70 жилийн ой тохиож байгаагаараа онцлогтой төдийгүй амжилт бүтээл дүүрэн энэ жичээлийн жилээ үдэж нийт 24 доктор, 424 магистр, 4500-аад оюутан бакалаврын зэрэгтэй төгсөж байна. Харин өнгөрсөн 70 жилийн хугацаанд МУИС-ийг 315 доктор, 3807 магистр, 57922 бакалавр төгсөн гарчээ.
Нийт төгсөгчдөдөө Монгол Улсын Их Сургууль үүсэн байгуулагдсаны түүхт 70 жилийн ойн баярын мэндийг хүргэж, цаашдын эрдмийн их үйлсэд нь хязгаар бүү байг хэмээн ерөөе.
