МУИС-ОУХНУС-ийн Нийтийн удирдлагын тэнхимийн дэргэдэх “Мини Парламент” клубийн 2021-2022 оны хичээлийн жилийн хаврын чуулган төрийн удирдлага хөтөлбөрөөр суралцаж буй II, III, IV түвшин болон ерөнхий суурийн оюутнуудын дунд 2022 оны 04-р сарын 09-ний өдөр амжилттай зохион байгуулагдлаа.
Тус чуулганд төрийн удирдлагын IV түвшний оюутан Б.Зулцэцэг “XXI зууны төрийн албан хаагчийн цогц чадамж” сэдвээр илтгэл тавьж, хуралдаанд оролцогсод ирээдүйн төрийн албан хаагчдад шаардлагатай мэдлэг, ур чадвар, хандлага, үнэт зүйлсийг эзэмшихэд оюутан, багш, тэнхим болон сургуулийн захиргааны зүгээс хамтран ажиллах боломжийн талаар нээлттэй хэлэлцүүлэг өрнүүлсэн юм. Түүнчлэн төрийн удирдлагын сургалтын хөтөлбөр, онолын ба практик мэдлэг, багш-оюутан-төгсөгчдийн хамтын ажиллагааны талаар оюутнууд баг болон хэлэлцэж, харилцан санал солилцлоо.
Тус чуулганд “Мини Парламент” клуб нийгмийн хариуцлагын хүрээнд Эх Хүүхдийн Эрүүл Мэндийн Үндэсний Төвийн Бөөр, дотоод шүүрлийн эмгэг судлалын тасагт хэвтэн эмчлүүлж буй хүүхдүүдэд зориулан ном хандивлах аяныг зохион байгуулсны үр дүнд цуглуулсан ном, бэлгийг тус тасгийн эмч н.Булганд гардуулан өглөө. Энэхүү сайн үйлсийн аянд нэгдэн ном хандивласан нийт багш, оюутнууддаа гүн талархал илэрхийлье. Мини Парламент клубийн 2021-2022 оны хичээлийн жилийн хаалтын чуулган 2022 оны 05-р сард зохион байгуулагдахаар төлөвлөж байгаа ба сонирхсон оюутнуудад нээлттэй болно. Тус клубийн нийт гишүүд болон төрийн удирдлагын хөтөлбөрийн оюутнууддаа цаашид клубынхаа үр дүнтэй тогтвортой ажиллагааг хангах, зорилго чиглэлийг өргөжүүлэх, нийгэмд нөлөөлөх үйл ажиллагаа болон эрдэм мэдлэгийн их үйлсэд нь амжилт хүсье.
“Мини Парламент” клуб нь 2015 онд төрийн удирдлагын хөтөлбөрийн багш Г.Мягмар болон оюутнуудын санаачилгаар байгуулагдсан бөгөөд “Мини Парламент” болон “Мини УИХ”-н нэр лого нь Оюуны Өмчийн Газрын барааны тэмдгийн мэдээллийн санд 2017 онд бүртгэгдэж баталгаажсан.
Нийтийн Удирдлагын Тэнхим
