ШУС-ийн Социологи, нийгмийн ажлын тэнхимд ГБХЗХГ-ын Мэдээллийн технологи, хяналт шинжилгээ, үнэлгээний газрын дарга Н.Оюунчимэг Нийгмийн хамгаалал, бодлого, хөтөлбөртэй холбоотой 400 гаруй тайлан бүтээл, ном сурах бичиг гардууллаа. Түүнчлэн нийгмийн ажлын өв болох “Залгамжлагч”, “Пионерийн үнэн” зэрэг нэн ховордсон сонин, сэтгүүлийг цахим хэлбэрт оруулж, МУИС-ийн номын сангаар дамжуулан оюутнуудын хүртээл болгох талаар энэхүү арга хэмжээн дээр дурдсан юм. Цахим болгох ажлыг тус тэнхимийн “Залуу нийгмийн ажилтан” клубын оюутнууд хийнэ.
Ном хандивласантай холбоотой тэнхимд оруулж буй хувь нэмрийг үнэлж, Социологи, нийгмийн ажлын тэнхимийн эрхлэгч М.Батбаатар, ГБХЗХГ-ын МТХШҮГ-ын дарга Н.Оюунчимэгт “Номын садан” өргөмжлөл гардуулж, үг хэлэв.
МУИС-д Социологи, нийгмийн ажлын тэнхим үүсгэн байгуулагдаад 30 гаруй жил болж байгаа бөгөөд энэ хугацаанд Нийгмийн ажил хөтөлбөрөөр үндэсний түвшинд 500 орчим нийгмийн ажилтныг бэлтгэсэн юм. Тус тэнхимээс санаачлан Үндэсний түвшинд хүүхэд хамгааллын тогтолцоог бэхжүүлэх, эрх зүйн орчин, бодлого стратегийг сайжруулах, төлөвлөх үйл ажиллагааны хүрээнд өнгөрсөн 20 гаруй жилийн хугацаанд Хүүхдийн эрх, хүүхэд хамгаалал, хөгжлийн чиглэлээр хийгдсэн сургалт, судалгаа, бодлого нөлөөллийн үйл ажиллагаанд дүн шинжилгээ хийж, хэрэгжилтийг үнэлэх, стратеги төлөвлөгөөг сайжруулах ажлыг Мэдээллийн технологи, хяналт шинжилгээ, үнэлгээний газартай хамтран хэрэгжүүлэхээр төлөвлөж байна.
СОЦИОЛОГИ, НИЙГМИЙН АЖИЛ ТЭНХИМ
