МОНГОЛ УЛСЫН ХҮРЭЭЛЭН БУЙ ОРЧНЫ ТОГТВОРТОЙ МЕНЕЖМЕНТЭД ЕВРОПЫН ТУРШЛАГААС НЭВТРҮҮЛЭХ НЬ – ONE ТӨСӨЛ
Энэ төслийн Англи нэр нь “European Orientation for Sustainable Environmental Management in Mongolia” бөгөөд товчлол нь ONE юм. Уг төсөл нь Европын Холбооны ERASMUS+ хөтөлбөрийн Jean Monnet дэд хөтөлбөрөөс санхүүжиж байна. Уг дэд хөтөлбөр нь дээд боловсролын байгууллагын сургалт, судалгаанд дэмжлэг үзүүлдэг.
Jean Omer Marie Gabriel Monnet хэмээх Франц эрэгтэй 1888-1979 оны хооронд амьдарч байсан дипломатч, санхүүч, улс төрч, бизнесмен хүн байжээ. Тэрээр Европын улсуудыг нэгтгэхийн төлөө шаргуу зүтгэсэн бөгөөд үүнийгээ амжилттай хэрэгжүүлсэн. Түүнийг “Европын эцэг” хэмээн нэрлэдэг.
Европын комисс 1989 оноос эхлэн Jean Monnet дэд хөтөлбөрийг хэрэгжүүлж эхэлсэн ба уг дэд хөтөлбөр нь Европын Холбооны улс төр, шинжлэх ухаан, төрөл бүрийн салбарын сайн туршлагыг дэлхий нийтэд боловсролын салбараар дамжуулан түгээх үндсэн зорилготой. Өнөөг хүртэл 100 гаруй улсын +1000 илүү их, дээд сургуулийн +9000 орчим багш, оюутнууд энэхүү дэд хөтөлбөрт хамрагдаад байна. Монгол Улсын хувьд бол энэ төсөл нь Jean Monnet дэд хөтөлбөрийн анхдагч болохын зэрэгцээ Төслийн үндсэн удирдагч болж байгаагаараа онцлог юм.
Төслийн үндсэн зорилго нь Европын холбооны Ногоон хэлэлцээр (Green Deal), хүрээлэн буй орчны хэтийн төлөв, бодлого, менежментийг Монгол улсын дээд боловсролын системээр дамжуулан ирээдүйн боловсон хүчин болох залуу үеийнхэнд зааж ойлгуулахад оршино. Үүний тулд дараах зорилтуудыг хэрэгжүүлнэ. Үүнд:
- Олон улсын зун сургалт зохион байгуулах
- Европын холбооны тогтвортой хөгжлийн бодлого, ногоон санхүү, байгаль дээр суурилсан шийдэл, уур амьсгалын өөрчлөлтөд уян хатан байдал сэдвүүдээр сургалтын материал бэлтгэх
- Нийтэд нээлттэй цахим сургалт бэлтгэх, түгээх
- Судалгаа шинжилгээ хийж, үр дүнг олон улсын болон дотоодын сэтгүүлд хэвлүүлэх
- Шинжлэх ухааны судалгаа-хэрэглээний семинар, дугуй ширээний уулзалт зохион байгуулах
- Төслийн үр дүнг олон нийтэд түгээх
Төслийн логоны үндсэн санаа нь Монгол Улс, Европыг холбооны хамтын ажиллагааны хязгааргүй боломжийг билэгдсэн үүлэн хээ бүхий Төслийн товчлол нэр бүхий тэнгэрт нисэж буй байдлыг илэрхийлсэн.
Төсөлд нийт Монгол, Эстони, Итали, Герман, Нидерланд 5 улсуудын 5 байгууллагын 10 судлаачид оролцож байгаа ба МУИС нь Төслийн үндсэн удирдагч юм.
- Монгол улсын их сургуулийн Хүрээлэн буй орчин, ойн инженерчлэлийн тэнхим болон Европ судлалын тэнхим
- Монголын тогтвортой санхүүжилтийн холбоо
- Эстони улсын Хөдөө аж ахуйн их сургууль
- Итали улсын Катанын их сургууль
- Герман улсын Мартин–Лютерийн их сургууль
- Нидерланд улсын Erda RTE судалгаа, технологи, боловсролын хүрээлэн
