МУИС-ийн Социологи Нийгмийн ажлын тэнхимийн дэргэдэх Залуу Социологич клубийн оюутнууд “Нийгмийг дүрс зургийн хэлээр илэрхийлэхүй” төслийг санаачлан эхлүүлж Монголын Урлагийн Зөвлөлөөс 5 дахь жилдээ зохион байгуулж буй “Петер Морроу”-ийн нэрэмжит “ГЭРЭЛТ МОРЬД” шинэ уран бүтээлийн төслийн тэтгэлгийг хүлээн авсан билээ.
“Нийгмийг дүрс зургийн хэлээр илэрхийлэхүй” төсөл нь мэргэжлийн уран бүтээлчид болон социологи мэргэжлээр суралцагч оюутнууд хамтран оюутан залуус, олон нийтэд урлаг болон социологийн шинжлэх ухааны огтлолцол дээр өнөөдрийн нийгэмд орших бодит асуудлыг гэрэл зураг болон социологийн тайлбарлалаар дамжуулан харуулах зорилготой.
Уг үзэсгэлэнд толилуулж буй гэрэл зургууд нь бидний амьдарч буй нийгмийн дүрслэл ба хормоор хэмжигдэх амьдралын агшинг өөрсдийн мэдрэмжээр буулгасан оюутан бидний харсан өнцөг юм. Харин гэрэл зургуудын хүрээнд бид шууд болон шууд бус байдлаар тодорхой нэг нийгмийн асуудлыг хөндөж, түүний учир шалтгааныг социологийн дурангаар тайлбарлалаа.
Бид таныг харах, унших, бодох орон зайд урьж байна. Үзэсгэлэнгээс авах өөрийн мэдрэмжээрээ амьдарч буй нийгмээ бидэнтэй хамт та ч бас эргэцүүлээрэй.
