Старт-Ап, инноваци гэх орчин үеийн үг хэллэг нийгэм, хүмүүнлэгийн салбараас хол сонсогддог. Нийгэм хүмүүнлэг тэр тусмаа гадаад, хэл соёлыг судалдаг оюутнууд бусад салбарын оюутантай хамтарч ямар шинэ санаа гаргаж болох, салбар дундын хамтын ажиллагааг хөгжүүлэх зорилгоор “Старт-Ап Франкофон” тэмцээнийг зохион байгууллаа.
Тэд гадаад хэлний мэдлэг болон өөр салбарын мэдлэгээ ашиглан гарааны бизнесээ эхлүүлэх, санхүүжилт босгох, цаашдын ажлын байрны таатай орчныг бүрдүүлэх, бизнес эрхлэгчдээс зөвлөгөө авч шинэ санаагаа боловсронгуй болгох боломж бүрдүүлэхийг зорьсон болно.
Тэмцээний өмнө “Бизнес санаагаа хэрхэн бодож олох вэ?” /ментор: New Progress Group-ийн бизнес хөгжил эрхэлсэн захирал Базаргүрүү/, “Бизнес загвар хэрхэн гаргах вэ?” /ментор: СЭЗИС-ийн Энтрепренершип, инноваци чиглэлийн магистрант Гандиймаа/, “Pitch Deck”- “Бизнес найраа” хэрхэн хийх вэ?” /AUSA EDUCATION AGENCY-ийн захирал Г. Уянгацэцэг/ сэдвээр оюутан залууст гарааны бизнесийн анхан шатны мэдлэг олгох 2 өдрийн ментор сургалтыг хийв.
Уг тэмцээнд МУИС-ийн франц хэл, орон судлал, ОУХНУС, хууль зүй, хими, ХШУИС-ийн салбарын нийт 25 оюутан 9 баг болж өрсөлдөв. Шүүгчээр “AUSA education agency”-ын захирал Г.Уянгацэцэг, JC DECAUX компанийн борлуулалт хариуцсан захирал Санчо, МУИС-ийн Европ судлалын тэнхимийн эрхлэгч Г.Мөнх нар уригдан оролцов.
Тэд орчин үеийн техник хэрэгсэл ашиглаж франц хэлийг хурдан сурах Апп бүтээх, бусдын хувцас сонгоход зөвлөгөө өгөх, оюутанд хоол ундаар үйлчлэх, франц хэлтэнд оронд аялаж жуулчлахад зориулсан мэдээлэл, карт ашиглаж хэл сурах зэрэг сонирхолтой, шинэ санаа гаргалаа. PRO LANGUE (Г.Цэгц-Эрдэнэ, О.Амарбаясгалан /ХШИУС/), Л.Оюу-Эрдэнэ /франц хэл/) баг нэгдүгээр байр эзэлж 500 000 төгрөгийн шагнал гардаж AUSA EDUCATION AGENCY-тэй хамтарч ажиллах санал авсан бол, GRYFFINDOR (Э.Мягмарсүрэн /франц хэл/, М.Мягмарсүрэн /хууль зүй/) баг 300 000 төг-өөр шагнуулж хамтарч ажиллах санал мөн авлаа. III байрт VERITAS (Г.Эрмүүн /БУС Хими/, Б.Индра /ОУХНУС/) баг шалгарч аялал жуулчлалын чиглэлийн компаниудтай уулзалт хийж хамтарч ажиллах санал тавихаар болов.
