Монгол Улсын Их Сургууль түүхт 80-н жилийн ойн хүрээнд санаачлан “Web of Science” мэдээллийн санд Монгол улсын тэргүүлэх их сургууль, эрдэм шинжилгээний байгууллагын судлаачдын хэвлэгдсэн бүтээлийн үр нөлөөг байгууллагын түвшинд сайжруулах нь” төслийг 2022 онд МУИС, Clarivate Аnalytics групп, Монголын дижитал мэдлэгийн шийдлүүд компанийн хамтарсан баг амжилттай хэрэгжүүллээ.
Дэлхийн шинжлэх ухааны нэр хүндтэй Web of Science мэдээллийн санд Монгол Улсын 1960-аад оноос хойш хэвлэгдсэн, 6000 орчим бүтээлийн зохиогчдын харьяалал нь манай улсын эрдэм шинжилгээний байгууллага болон их сургуулиудын албан ёсны нэр нэг бус удаа өөрчлөгдсөнөөс шалтгаалж хэвлэгдсэн бүтээлүүдийн тоог байгууллага тус бүрээр үнэн зөв гаргах, байгууллагын чансааг тогтоох, гадаад, дотоод хамтын ажиллагааны үнэлгээ хийх, зэрэгт учир дутагдалтай байсан юм.
Иймээс МУИС, Clarivate Аnalytics групп хамтран манай улсын их сургууль, эрдэм шинжилгээний байгууллагуудаас Web of Science мэдээллийн санд бүртгэлтэй сэтгүүлүүдэд хэвлүүлсэн нийт бүтээлийн 80 орчим хувийг бүрдүүлж буй тэргүүлэх 10 байгууллагын өнөөгийн нэрийн баталгаажуулалтыг хянан засварлаж, тэдгээрийг үнэн бодитой үнэлж эрэмбэлэх, өрсөлдөх чадвараа сайжруулахад чухал ач холбогдолтой ажил болсныг дурдахад таатай байна.
Тус төслийн гол үр дүнд Монголын эрдэм шинжилгээний байгууллага, тэргүүлэх их сургуулиудын олон улсад өрсөлдөх чадвар, зэрэглэлийг үнэлэхэд гол үзүүлэлт болох олон улсын эрдэм шинжилгээний бүтээл, эшлэлийн тоог нэмэгдүүлэх, байгууллагын түвшинд 1967 оноос хойших хугацааны Web of Science мэдээллийн санд бүртгэлтэй бүтээлийн сантай болох, Clarivate Аnalytics группын үнэлгээний Incities платформд төсөлд хамрагдсан байгууллагуудын профайл үүссэн зэргийг онцлон дурдахын зэрэгцээ төслийг хэрэгжүүлэхэд хамтран ажилласан ШУА, АШУҮИС, ХААИС, МУБИС, ШУТИС, ДХИС, СУИС, СЭЗИС-ийн удирдлагууд болон Эрдэм шинжилгээний алба, хэлтсийн хамт олонд талархал илэрхийлье.
Төслийн үр дүнг доорх холбоосоор үзнэ үү.
МУИС-ийн Судалгаа, инновацийн бодлогын газар
