Монгол Улсын Их Сургуулийн Оюутны хөгжлийн төвийн “NUM CAREER” үйлчилгээний танхимын нээлт боллоо. “NUM CAREER” зөвлөх үйлчилгээний танхимын зорилго нь суралцагч, төгсөгчдөд ажил мэргэжлийн баримжаа олгох, карьер төлөвлөлтөө хийхэд туслах, дэмжих, ажлын байранд бэлтгэх, зуучлах, суралцагчдад зөөлөн ур чадварыг эзэмшүүлэх замаар хөдөлмөрийн зах зээлд чанартай боловсон хүчин бэлтгэн, нийлүүлэх юм.
Тус төвийн нээлтийг Зориг сан болон Глобал Шейперс-Улаанбаатар нийгэмлэг, Франкофон хамтын ажиллагааны төв хамтран зохион байгуулсан бөгөөд нээлтэд МУИС-ийн Оюутны хөгжил эрхэлсэн захирал Г.Галбаяр, Оюутны хөгжлийн бодлогын газар, Оюутны хөгжлийн төвийн удирдлагууд, Монгол Улсад суугаа Австралийн Элчин Сайд Кейти Смит, Зориг сан, Франкофон хамтын ажиллагааны төвийн захирал урилгаар ирж оролцлоо.
Нээлтийн эхний хэсэгт карьер үйлчилгээний үйл ажиллагааны талаар оюутнуудад танилцуулга хийж мэдээлэл өгсөн. Нээлтийн үеэр нээлтэд оролцсон суралцагчдад зориулан панел хэлэлцүүлэг, чөлөөт арга хэмжээний үйл ажиллагаа зохион байгуулсан болно. Хэлэлцүүлэгт “Карьер хөгжил, сургамж” сэдвээр Монголын Маркетингийн Холбооны гүйцэтгэх захирал Т.Энхбаясгалан, “Ард секюритиз” ҮЦК-ийн гүйцэтгэх захирал Ц.Бархас нар өөрсдийн туршлага дээр үндэслэн сонирхолтой мэдээлэл хүргэлээ.
Мөн оюутан суралцагчдад CV бичих арга аргачлал, ажлын ярилцлагад бэлтгэх сургалтыг Worki компанийн үйл ажиллагаа эрхэлсэн захирал Л.Тэмүүлэн хүргэлээ.
