АХБ-ны ерөнхийлөгч, доктор Харухико Курода өнөөдөр МУИС-д зочилж, “Монгол Улс ба Азийн Хөгжлийн Банкны хамтын ажиллагааны 20 жил” сэдвээр лекц уншлаа. Ноён Харухико Курода Азийн хөгжлийн банк ба Монгол улс хоорондын хамтын ажиллагааны ололт амжилт, үр дүн, цаашдын чиг хандлагыг тодорхойлсон лекцэндээ “Монгол улсын эдийн засаг сүүлийн 20 жил шилжилтийн хэв шинжтэй явж ирэхдээ гайхамшигтай ахиц авчирсан. Энэ амжилтын гол хүчин зүйл нь зах зээлийн зөв бодлого тууштай авч хэрэгжүүлсэнтэй холбоотой юм. Танай улсад уул уурхайн салбараа дагасан эдийн засгийн өсөлт харагдаж байгаа нь сайн хэрэг ч үр шимийг нь тэгш, шударга байдлаар хүн бүрт хүртээх явдал чухал юм. Түүнчлэн улсын төсвийн оновчтой мониторинг хийх, Засгийн газар нь авилга, хээл хахуультай тууштай тэмцэх, хууль дүрмээ чанад сахих, байгаль орчин, боловсрол, эрүүл мэндэд түлхүү хөрөнгө оруулсан ээлтэй бодлого явуулах нь зүйтэй” гэлээ.
Түүнчлэн тэрбээр Монгол улс нь АХБ-ны ердийн эх үүсвэрээс санхүүжилт авах эрхтэй болсонд баяр хүргэж, цаашид байгаль орчин, боловсрол, эрүүл мэндийн салбарт чиглэсэн хүн бүрт хүртээмжтэй дэмжлэг туслалцаа үзүүлж ажиллахаа илэрхийлэв. Мөн төр хувийн хэвшлийн хамтын ажиллагаа, бүс нутгийн тогтвортой хөгжлийг бий болгоход чиглэсэн бодлого хэрэгжүүлэхээс гадна усны нөөц, эрчим хүч, хүнсний аюулгүй байдал, өргөн хэрэглээний барааны өсөлтийг бууруулах зэрэг дэд хөтөлбөрүүдэд хамтран ажиллахаа нэмж хэлэв. Ерөнхийлөгч Харухико Курода Ази Номхон Далайн Бүс Нутгийн хөгжиж буй орнуудын ард түмний амьжиргааг дээшлүүлэх, эдийн засгийн тогтмол өсөлтийг дэмжсэн тууштай бодлого барихаа дурдаад, Монгол улстай түншлэлээ улам бүр бэхжүүлж ажиллана гэв. Тэрбээр лекцийнхээ төгсгөлд Монгол улс хурдацтай хөгжлийн босгонд ирснийг цохон тэмдэглэсэн юм.
Өнгөрсөн 20 жилийн хугацаанд АХБ-наас Монгол улсад 795 сая ам.долларын зээл, 172 сая ам.долларын буцалтгүй тусламж, 86 сая ам. долларын өртөг бүхий техникийн туслалцаа үзүүлсэн байна.
МУ-ын ерөнхийлөгчийн урилгаар “Аз жаргалтай, төгс төгөлдөр ирээдүйн төлөө” уриан дор зохион байгуулагдсан өндөр хэмжээний чуулганд уригдан ирсэн АХБ-ны ерөнхийлөгч Харухико Курода нь 2004 оноос энэ албыг хашиж байна.
