Жил бүрийн 4 дүгээр сарын 26-нд тохиодог Дэлхийн оюуны өмчийн өдрийг тохиолдуулан МУИС-ийн эрдэмтэн, судлаачдын оюуны өмчийн бүтээлийг олон нийтэд сурталчлан таниулах, бүтээл туурвих, шинийг санаачлах, оюуны өмчийг эдийн засгийн эргэлтэд оруулах үйл ажиллагааг дэмжих зорилгоор “МУИС-ийн ОЮУНЫ ӨМЧИЙН ӨДӨРЛӨГ 2022” арга хэмжээг 2022 оны 4 дүгээр сарын 22-ны өдөр Оюуны өмчийн газар, Монголын Оюуны өмчийн итгэмжлэгдсэн төлөөлөгчдийн холбоо, Монголын Хуульчдын Холбооны Иргэний эрх зүйн хороо, МУИС-ийн Хууль зүйн сургуулийн Хувийн эрх зүйн тэнхимтэй хамтран зохион байгууллаа.
МУИС-ийн захирлын 2022 оны 04 дүгээр сарын 20-ны өдрийн А/133 дугаар тушаалаар “МУИС-ийн Шилдэг оюуны өмч бүтээгч”-ийг шалгаруулсан ба тус өдөрлөгөөр шагнал гардууллаа.
“МУИС-ийн Шилдэг оюуны өмч бүтээгч”-ийн шагналыг МУИС-ийн захирал Б.Очирхуяг, Оюуны өмчийн газрын дарга Г.Элбэгсайхан, Захиргаа удирдлагын хэлтсийн дарга Д.Амгалан, Монголын оюуны өмчийн итгэмжлэгдсэн төлөөлөгчдийн холбооны тэргүүн Д.Эрдэнэчимэг, МХХ-ны Иргэний эрх зүйн хорооны тэргүүн Ч.Отгонбаатар нар гардууллаа.
Арга хэмжээний үеэр “Оюуны өмчийг эдийн засгийн эргэлтэд оруулах боломж” сургалт, хэлэлцүүлгийг зохион байгуулсан ба “Шинжлэх ухаан, технологийн эрхзүйн орчин, цаашид баримтлах бодлого, төлөвлөлт” сэдвээр БШУЯ-ны Шинжлэх ухаан, технологи, инновацийн бодлого, хэрэгжилтийг зохицуулах газрын ахлах шинжээч Ц.Намчинсүрэн, “Оюуны өмчийн хууль тогтоомжийн шинэчлэл” сэдвээр Оюуны өмчийн газрын Шинэ бүтээл, ашигтай загварын ахлах шинжээч, ТИСК хөтөлбөрийн зохицуулагч Б.Одгэрэл, “Хамтрах ажиллах гэрээний хэлбэр ба оюуны хөрөнгө оруулалт” сэдвээр МУИС-ийн Хууль зүйн сургуулийн багш Б.Оюунжаргал, “Зохиогчийн эрх зүйн зарчим, олон улсын чиг хандлага” сэдвээр МӨОИТХ-ны тэргүүн Д.Эрдэнэчимэг, “Оюуны өмчийн лицензийн гэрээ” сэдвээр МХХ-ны Иргэний эрх зүйн хорооны Оюуны өмчийн эрх зүйн дэд хорооны зохицуулагч Э.Болорчулуун, “МУИС-ийн оюуны өмч ба технологи дамжуулалтын хэлбэрүүд” сэдвээр МУИС-ийн ИТДТ-ийн эрхлэгч Д.Лхагвасүрэн нар тус тус зааж, багш судлаачидтай хэлэлцүүлэг өрнүүллээ.
“МУИС-ийн Шилдэг оюуны өмч бүтээгч-2022”
| № | Бүтээлийн нэр | Зохиогчийн нэр |
| 1 | Байгалийн цеолит агуулсан криогель полимер материалыг синтезийн аргаар гарган авах арга | Проф. Б.Очирхуяг, Магистр. М.Долгормаа, Г.Болоржаргал |
| 2 | Байгалийн цеолит болон алгинат агуулсан композит шингээгч материалыг гарган авах арга | Проф. Б.Очирхуяг, Дэд проф.Г.Тамираа, Магистр. М.Долгормаа |
| 3 | Төвд ланцайг өсгөвөрлөх арга | Проф.Ж.Сүхдолгор, Дэд проф. Г.Баярмаа, Др. Г.Ганзул; Др.Т.Сувдмаа, Магистр. Н.Нямгэрэл; |
| 4 | Актиномицетийн хандыг ашигласан хоолойны үрэвслийн эсрэг үйлчилгээтэй хүлхмэл | Дэд проф. Б.Даваапүрэв, Проф. Ж.Батхүү, Д.Энхтуул; О.Ундармаа; Г.Намуунаа |
| 5 | Монгол догар ургамал ашигласан бактерийн эсрэг идэвхтэй тосон түрхлэг болон түүнийг үйлдвэрлэх арга | Дэд проф. Б.Даваапүрэв, Проф.Ж.Батхүү, Др.И.Туяажаргал, Др. Ц.Бямбажав |
| 6 | Цэвэрлэх байгууламжийн лагийг боловсруулан бордоо үйлдвэрлэх арга | Дэд проф. Т.Энхдөл, Магистр. Б.Өсөхбаяр; Магистр. Ц.Батцэрэн, Бакалавр. А.Пүрэвжал |
| 7 | Хуурайшилт, давсжилтад тэсвэртэй ургамлын үрийн сонголт хийх арга | Проф. Д.Пүрэв; Дэд проф. Ж.Баярмаа |
| 8 | Хүний толгойн үсийг ашиглан хүнцэл, хромыг шингээгч биоматериал гарган авах арга | Проф. О.Болормаа, Дэд проф. Н.Амгалан, Магистр. М.Долгормаа |
| 9 | Модон хуванцар композит материал болон түүнийг үйлдвэрлэх арга | Дэд проф. Т.Энхдөл, Проф. Д.Дорж, Дэд проф. Ц.Соёл-Эрдэнэ, Т.Цагаанцоож |
| 10 | Актиномицетийн ханд агуулсан, бактерийн эсрэг үйлчилгээтэй тосон бүтээгдэхүүн | Проф. Ж.Батхүү, Дэд проф. Б.Даваапүрэв, О.Ундармаа; Г.Намуунаа, Д.Энхтуул |
| 11 | Цомцогт бэр цэцэг ургамлын ханд агуулсан элэг хамгаалах шахмал | Дэд проф.Б.Даваапүрэв, Ц.Бямбажав; Т.Цэнгүүн, Г.Намуунаа |
| 12 | Ухаалаг хогийн сав | Дэд проф. Д.Болормаа, Магистр. Б.Сүхболд; |
| 13 | Сүвэрхэг биш хатуу гадаргуу дээр бактерийн эсрэг идэвхтэй үйлчлэх зэсийн (I) нанокомпозит бүрхүүл үүсгэх арга | Дэд проф. Х.Тэгшжаргал, Магистр. Ц.Номин; Бакалавр.М.Лхагвасүрэн; Б.Түвшин |
| 14 | Төмс, хүнсний ногооны хадгалалтын хугацааг уртасгах ионжуулагч цацрагийн төхөөрөмж | Дэд проф. Б.Мөнхбат; Дэд проф. Р.Чинзориг |
Инноваци, технологи дамжуулах төв
